Пад такой назвай 18 лютага на Дзятлаўшчыне стартуе раённая дыстанцыйная пяцідзёнка, прымеркаваная да Дня абаронцаў Айчыны і Узброеных Сіл Рэспублікі Беларусь.
Завяршыцца мерапрыемства 23 лютага пленумам раённага савета ГА “БРПА” з сімвалічнай назвай “Памяць. Вернасць. Абавязак”. Ён таксама пройдзе ў анлайн-рэжыме.
Старт пяцідзёнцы дадуць урачыстыя лінейкі, якія пройдуць ва ўстановах адукацыі 18 лютага. У гэты ж дзень навучэнцы 8-11 класаў прымуць удзел у анлайн-апытанні “Прэстыж арміі. Вашы адносіны да воінскай службы”.
19 лютага будзе праходзіць пад дэвізам “Я ведаю! Я ганаруся!”. У гэты дзень вучняў чакаюць конкурсы дзіцячага малюнка “Нашай арміі героі” і рэкламных буклетаў, плакатаў, прэзентацый “Я ведаю! Я ганаруся!”, а таксама раённы конкурсна-інтэлектуальны анлайн-экспрэс “Моцная армія – моцная Беларусь!”.
20 лютага цімураўскія і валанцёрскія атрады ГА “БРПА” і ГА “БРСМ” уключацца ў раённую акцыю “Памяць застаецца з намі”. Яны арганізуюць працоўныя дэсанты па навядзенні парадку на мемарыялах, помніках і абелісках воінскай славы і прылеглых да іх тэрыторыях. У 14 гадзін навучэнцы Дзятлаўшчыны далучацца да віртуальнага раённага этапу абласнога конкурсу рэкламы “Ёсць такая прафесія – Радзіму абараняць”.
22 лютага ва ўстановах адукацыі раёна пройдуць ваенна-спартыўныя спаборніцтвы і гульні “Ордэн мужнасці” да Дня абаронцаў Айчыны. Таксама юныя дзятлаўчане паўдзельнічаюць у крэатыў-трэйсеры, у час якога павіншуюць з надыходзячым святам ветэранаў піянерскага і камсамольскага руху, Вялікай Айчыннай вайны, воінаў-інтэрнацыяналістаў.
Ірына СТЫРНІК
