З 1 верасня 2020 года па 31 сакавіка 2021 года ў Беларусі адкрыта паляванне на бабра і выдру.
Паляваць на дадзены від жывёл можна кругласутачна. Аднак у цёмны час сутак паляваць ружэйным спосабам дазваляецца толькі ў прысутнасці службовай асобы карыстальніка паляўнічых угоддзяў.
Пры ружэйным паляванні дазваляецца прымяняць наразную зброю (з дульнай энергіяй кулі звыш 1500 джоўляў), гладкаствольную зброю (з выкарыстаннем патронаў з куляй ці карцеччу). Пры безружэйным паляванні дазваляецца выкарыстоўваць пасткі (акрамя петляў), а таксама паляўнічых сабак (акрамя ганчакоў і хартоў).
У выпадку, калі пасткі выпадкова трапілі амерыканская норка або андатра, паляўнічы, перад тым як дастаць жывёлу з пасткі, павінен зрабіць запіс на адваротным баку паляўнічай пуцёўкі з указаннем віду здабытай жывёлы (андатра або амерыканская норка) і дату яе здабычы. А калі ў пастку трапіла жывёла нарміруемых відаў, на здабычу якой у паляўнічага няма адпаведнага дазволу, або жывёла, занесеная ў Чырвоную кнігу Рэспублікі Беларусь, паляўнічы абавязаны паведаміць аб гэтым службовым асобам паляўнічай гаспадаркі, пры гэтым не вымаючы здабытую жывёлу з пасткі да іх прыбыцця.
Таксама нагадваем, што з 5 верасня (першая субота верасня) дазволена здабыча рабчыка і шэрай курапаткі. Паляваць на гэтых птушак можна таксама без абмежаванняў па полу і ўзросце, але толькі ў светлы час сутак. Спосабы палявання на рабчыка і шэрую курапатку: ружэйны (з падыходу, з засады) з выкарыстаннем гладкаствольнай паляўнічай зброі і патронаў са шротам, паляўнічых сабак (выжлаў, спаніэляў, рэтрывераў); безружэйны – з дапамогай лоўчых птушак. Паляванне працягнецца да 13 снежня.
Алег ТРАФІМЧЫК,
дзяржінспектар Слонімскай міжраённай інспекцыі аховы жывёльнага і расліннага свету
Подписывайтесь на телеграм-канал «Гродно Медиа Group» по короткой ссылке @GrodnoMediaGroup
