9 чэрвеня 2020 года спаўняецца 125 гадоў з дня нараджэння нашага знакамітага земляка, доктара філасофіі, літаратуразнаўцы, грамадска-палітычнага дзеяча Заходняй Беларусі Ігната Сымонавіча Дварчаніна, помнік якому ўпрыгожвае цэнтральную плошчу нашага Дзятлава.
Яшчэ ў студзені 2020 года Дзятлаўскай раённай арганізацыяй Таварыства беларускай мовы сумесна з аддзелам ідэалагічнай работы, культуры і па справах моладзі райвыканкама быў складзены план святкавання гэтага юбілея. Меркавалася правесці навукова-практычную канферэнцыю з запрашэннем вучоных з Акадэміі навук Беларусі, мясцовых краязнаўцаў, настаўнікаў, вучняў старэйшых класаў, супрацоўнікаў бібліятэк і ўсіх зацікаўленых асоб. На радзіме Ігната Дварчаніна, у вёсцы Погіры, і ў горадзе Дзятлаве, каля помніка рыхтавалі мітынгі з выступленнем самадзейных артыстаў, у тым ліку і погірскага народнага гурта, прамовы паэтаў і пісьменнікаў, конкурсы на лепшую дэкламацыю вершаў Ігната Дварчаніна, паэтаў з суседняй вёскі Зачэпічы і беларускіх класікаў. Бяда-пандэмія, якая абрынулася нечакана, сарвала нашы планы.
Актывісты ТБМ у гэтых умовах прынялі рашэнне сумесна з кампаніяй “Зробім лепш — 2020” надаць больш прывабны выгляд сядзібе ў вёсцы Погіры, на якой калісьці стаяла родная хата нашага вядомага земляка, пазначаная сёння мемарыяльнай дошкай. Трэба адзначыць, што цяперашняя гаспадыня гэтай хаты Надзея Лукашык – жанчына творчая, акуратная. Адна, без мужа, падтрымлівае ўзорны парадак. Сама і пакосіць, і пафарбуе, і пакапае, і кветкі пасадзіць, і дапаможа старэйшым за яе аднавяскоўцам.
Але каб у раёне з’явіўся яшчэ адзін лакальны турыстычны маршрут, мы вырашылі каля хаты ўсталяваць памятны камень, пасадзіць кветкі і дэкаратыўныя кусты, паставіць лаву для наведвальнікаў, а на шашы – адмысловы турыстычны ўказальнік.
Сярод вучняў і аматараў паэзіі Дзятлаўскага раёна ТБМ сумесна з раённай бібліятэкай аб’явілі ў відэафармаце конкурс на лепшую дэкламацыю вершаў беларускіх паэтаў (відэаролікі дасылаць на электронны адрас:cbs@tut.by). Спяшайцеся паўдзельнічаць. Тэрмін – да 15 ліпеня 2020 года. Пераможцаў і прызёраў чакаюць каштоўныя прызы.
Каб не парушаць правілы паводзін падчас пандэміі, на грамадскую працу выязджаем невялікімі групамі па тры-пяць чалавек. На сёння зрабілі нямала: пафарбавалі вароты, залілі фундаменты пад камень і лаўку, пасадзілі хосты, туі, заказаны выраб шыльды-ўказальніка. Запрашаем усіх, хто хоча чым-небудзь дапамагчы, далучацца да нас.
А 3 ліпеня, падчас святкавання Дня Незалежнасці Рэспублікі Беларусь і 80-годдзя ўтварэння Дзятлаўскага раёна, з 16 да 18 гадзін на пляцоўцы каля Дзятлаўскага музея будзе праводзіцца конкурс чытальнікаў вершаў, прысвечаных Дзятлаўшчыне, Беларусі, яе вядомым людзям, прыродзе роднага краю. Любы жадаючы можа прачытаць верш у рэальным фармаце.
Даведкі па тэлефонах: 8-029-906-40-97; 2-13-41 (музей).
Валерый ПЕТРЫКЕВІЧ,
краязнаўца, старшыня раённай філіі Таварыства беларускай мовы
Подписывайтесь на телеграм-канал «Гродно Медиа Group» по короткой ссылке @GrodnoMediaGroup
