На Дзятлаўшчыне стартуе абласны моладзевы праект “А ў нас у двары”.
Яго ўдзельнікаў чакаюць стварэнне калекцыі дваровых гульняў, цікавыя забавы, чэлендж, турнір і шмат пазітыву.
Арганізатарам праекта з’яўляецца Гродзенскі абласны камітэт грамадскага аб’яднання “Беларускі рэспубліканскі саюз моладзі” пры садзейнічанні упраўлення спорту і турызму Гродзенскага аблвыканкама.
– Дваровыя гульні для дзяцей і моладзі – выдатная магчымасць не толькі праявіць свае здольнасці, пабыць на свежым паветры, умацаваць здароўе, але і адзін са спосабаў палепшыць сяброўскія адносіны, навучыцца ўзаемавыручцы, паглыбіць сацыякультурны вопыт, – зазначае першы сакратар Дзятлаўскага раённага камітэта ГА “БРСМ” Кацярына Хілімончык. – Таму паўдзельнічаць у абласным праекце дзятлаўскай моладзі будзе цікава і карысна. А ў самых актыўных і крэатыўных дваровых каманд з’явіцца магчымасць выйграць спартыўны інвентар для сваіх дваровых тэрыторый ці спартыўных пляцовак. Напрыканцы праекта плануецца стварыць зборнік дваровых гульняў “А ў нас у двары”, таму самыя займальныя гульні абавязкова трапяць “у гісторыю”.
Кацярына Хілімончык расказала, што праект разлічаны на некалькі этапаў і прадоўжыцца да 1 снежня 2020 года. Цяпер, напрыклад, ствараецца калекцыя дваровых гульняў, папоўніць якую можна да 1 лістапада 2020 года. Жадаючыя падзяліцца гульнёй, папулярнай у іх двары ці на малой радзіме, могуць дасылаць на электронны адрас Дзятлаўскага раённага камітэта ГА “БРСМ” brsm@dyatlovo.gov.by апісанне гульні, яе правілы, а калі ёсць, то фотаздымкі і схемы.
На другім этапе ўдзельнікам праекта будзе прапанаваны чэлендж “А ў нас у двары”, заданні якога сфарміруюць з калекцыі дваровых гульняў. З 1 верасня па 20 лістапада 2020 года ў рамках фестывалю дваровых гульняў пройдуць гульнёвыя турніры, а затым будуць вызначаны і ўзнагароджаны пераможцы праекта. Адным словам, будзе весела. Далучайцеся!
Ірына СТЫРНІК
Подписывайтесь на телеграм-канал «Гродно Медиа Group» по короткой ссылке @GrodnoMediaGroup
