Вуліцы Дзятлава, названыя імёнамі герояў і ўдзельнікаў Вялікай Айчыннай вайны
Вуліца Пятрова. Названа ў гонар Героя Савецкага Саюза гвардыі палкоўніка Паўла Гаўрылавіча Пятрова, намесніка камандзіра 120-й гвардзейскай Рагачоўскай стралковай дывізіі, якая ў ліпені 1944 года вызваляла Дзятлаўскі раён.
Вуліца Вахоніна. Названа ў гонар Мікалая Рыгоравіча Вахоніна, камандзіра атрада “Барацьба” Ленінскай партызанскай брыгады (1942-1944 гг.).
Вуліца Белуша. Названа ў гонар Міхаіла Андрэевіча Белуша, партызана, падрыўніка атрада “Кастрычнік” Першамайскай партызанскай брыгады Гродзенскай вобласці. 16 чэрвеня 1944 года ў баі каля вёскі Купіск Навагрудскага раёна грудзьмі закрыў амбразуру варожага дзота. Узнагароджаны ордэнам Айчыннай вайны I ступені (пасмяротна).
Вуліца К. Заслонава. Названа ў гонар Канстанціна Сяргеевіча Заслонава. У кастрычніку 1941 года па ўласнай просьбе быў адпраўлены ў тыл ворага ў складзе групы чыгуначнікаў. Партызанскі псеўданім – “дзядзька Косця”. Стварыў падпольную групу, удзельнікі якой шляхам прымянення “вугальных мін” (міны, замаскіраваныя пад каменны вугаль) за тры месяцы падарвалі 93 нямецкія паравозы.
Вуліца Жолабава. Названа ў гонар Івана Аляксеевіча Жолабава, удзельніка Вялікай Айчыннай вайны, камандзіра партызанскага атрада “Дружба”.
Вуліца Булата. Названа ў гонар Барыса Адамавіча Булата, Героя Савецкага Саюза, камандзіра партызанскай брыгады “Наперад” Баранавіцкай і Мінскай абласцей.
Вуліца Макарава. Названа ў гонар Пятра Кузьміча Макарава, камандзіра партызанскай брыгады імя К. Я. Варашылава.
Брыгада дзейнічала на акупіраванай тэрыторыі Дзятлаўскага, Казлоўшчынскага, Жалудоцкага, Лідскага, Шчучынскага раёнаў Баранавіцкай вобласці.
Вуліца Біцько. Названа ў гонар Валянціна Сцяпанавіча Біцько, удзельніка Вялікай Айчыннай вайны. Камандаваў партызанскай групай, ротай. Стаў адным з арганізатараў партызанскага атрада “Арлянскі”, які дзейнічаў на тэрыторыі Дзятлаўскага раёна, потым быў начальнікам штаба ў атрадах “Барацьба”, “Перамога”. З ліпеня 1943 года – камандзір Ленінскага партызанскага атрада.
Вуліца Матросава. Названа ў гонар Аляксандра Мацвеевіча Матросава, Героя Савецкага Саюза, чырвонаармейца, стралка-аўтаматчыка. Загінуў у 19 гадоў, засланіўшы сваімі грудзьмі амбразуру нямецкага дзота, даўшы магчымасць байцам свайго ўзвода здзейсніць атаку апорнага пункта.
Вуліца Пішчуліна. Названа ў гонар Васіля Іванавіча Пішчуліна, партызана Ленінскай партызанскай брыгады, якая дзейнічала на тэрыторыі Дзятлаўскага раёна ў гады Вялікай Айчыннай вайны.
Вуліца Фогеля. Названа ў гонар Яна Янавіча Фогеля, Героя Савецкага Саюза, савецкага военачальніка, удзельніка Вялікай Айчыннай вайны. Вызваляў Дзятлаўшчыну.
Вуліца Філідовіча. Названа ў гонар Іосіфа Юр’евіча Філідовіча, які ў час Вялікай Айчыннай вайны быў сувязным Ленінскай брыгады, што дзейнічала на тэрыторыі Гродзеншчыны. Ратуючы партызанскі шпіталь, ён паўтарыў подзвіг вядомага рускага патрыёта XVII стагоддзя Івана Сусаніна.
Вуліца Русіна. Названа ў гонар Георгія Паўлавіча Русіна, старшыні Дзятлаўскага раённага падпольнага антыфашысцкага камітэта. Ён быў забіты нямецка-фашысцкімі захопнікамі 1 чэрвеня 1944 года.
Вуліца Фурсенкі (г. п. Наваельня). Названа ў гонар Івана Сямёнавіча Фурсенкі, Героя Савецкага Саюза, камандзіра 2012-га зенітнага артылерыйскага палка 49-й зенітнай артылерыйскай дывізіі 49-й арміі 2-га Беларускага фронту.
Вуліца Снітко (г. п. Наваельня). Названа ў гонар капітана Чырвонай арміі, удзельніка Вялікай Айчыннай вайны Івана Мікітавіча Снітко, які пасмяротна быў удастоены высокага звання Героя Савецкага Саюза. Таксама быў узнагароджаны ордэнамі Леніна і Аляксандра Неўскага, медалямі.
Вуліца Валькова (г. п. Казлоўшчына). Названа ў гонар Н. І. Валькова, камісара Чырвонай арміі. Загінуў у пачатку Вялікай Айчыннай вайны пад Казлоўшчынай.
Алена АБРАМЧЫК,
старшы навуковы супрацоўнік Дзятлаўскага гісторыка-краязнаўчага музея
Подписывайтесь на телеграм-канал «Гродно Медиа Group» по короткой ссылке @GrodnoMediaGroup
