У Дварэцкім доме культуры прайшло мерапрыемства, якое было прысвечана ўдзельнікам летняга студэнцкага атрада імя героя Савецкага Саюза Барыса Адамавіча Булата.
Мерапрыемства арганізавалі першы сакратар раённага камітэта ГА “БРСМ” Кацярына Хілімончык і работнікі КСУП “Дварэц-Агра”.
На сустрэчы прысутнічалі старшыня Дварэцкага сельвыканкама Канстанцін Вінцукевіч, старшыня раённага савета ветэранаў Міхаіл Губар, выконваючы абавязкі дырэктара КСУП “Дварэц-Агра” Аляксандр Сачык, інспектар па кадрах гаспадаркі Тамара Літвінава, работнікі Дварэцкага дома культуры.
Прысутныя бурнымі апладысментамі павіталі студатрадаўцаў, якія працавалі ў КСУП “Дварэц-Агра”.
Кацярына Хілімончык падзякавала моладзі, што яны праявілі ініцыятыву, прыйшлі і дапамаглі гаспадарцы.
– 2019 год – Год малой радзімы, мы павінны заўсёды клапаціцца і аказваць падтрымку сваёй малой радзіме, а для вас – гэта аграгарадок Дварэц.
Яна ўзгадала гісторыю студэнцкіх атрадаў, заснаванне Беларускага рэспубліканскага саюза моладзі.
Кацярына Хілімончык узнагародзіла граматамі студатрадаўцаў, якія ўжо не першы год працуюць у гаспадарцы: Ілью Маліку, Дмітрыя Сідорчыка, Уладзіслава Парфіновіча, Ксенію Лагута, Вольгу Радзюк. Алена Жукоўская, камандзір атрада, акрамя граматы атрымала памятны падарунак. Сувенірамі былі ўзнагароджаны і самыя маладыя ўдзельнікі атрада.
Першы сакратар раённага камітэта ГА “БРСМ” уручыла Падзячнае пісьмо выконваючаму абавязкі дырэктара КСУП “Дварэц-Агра” Аляксандру Сачыку за аказанне садзейнічання і дапамогу ў развіцці дзейнасці студатрадаўскага руху на тэрыторыі Дзятлаўскага раёна.
Сваімі ўспамінамі аб вучобе, камсамольскім юнацтве і рабоце ў студэнцкіх атрадах з моладдзю падзяліліся Міхаіл Губар, Аляксандр Сачык і Тамара Літвінава.
Аляксандр Сачык падзякаваў хлопчыкам і дзяўчынкам за дапамогу ва ўборцы ўраджаю, пажадаў ім поспехаў. Прыемным момантам для Аляксандра і Арцёма Кець, Аляксея Сачыка і Уладзіслава Аўсяніка стала атрыманне першага рабочага дакумента – працоўных кніжак. З гэтага моманту пачаўся іх працоўны стаж.
На працягу мерапрыемства для прысутных гучалі песні ў выкананні артыстаў Дварэцкага дома культуры.
Вольга ЮШКЕВІЧ
