Дзятлаўскім райкамам прафсаюза работнікаў аграпрамысловага комплексу падведзены вынікі спаборніцтва па нарыхтоўцы кармоў з траваў першага ўкосу па стане на 25 чэрвеня бягучага года.
У мэтах своечасовай і якаснай нарыхтоўкі кармоў, маральнай і матэрыяльнай зацікаўленасці работнікаў сельскагаспадарчай галіны раённы камітэт прафсаюза работнікаў аграпрамысловага комплексу штогод арганізуе раённае спаборніцтва на перыяд нарыхтоўкі кармоў з траваў першага ўкосу.
Конкурс традыцыйна праходзіць сярод сельскіх працаўнікоў і праводзіцца па дзвюх намінацыях: касьба траў, а таксама здрабненне і падбор сянажнай масы.
Абсалютнымі лідарамі, якія дамагліся лепшых вынікаў у раёне, сталі работнікі дзвюх сельгасарганізацый – ААТ “Граніт-Агра” і КСУП “Жукоўшчына”.
Старшыня райкама прафсаюза работнікаў АПК Уладзімір Казак наведаў сельгаспрадпрыемствы раёна, каб асабіста павіншаваць перадавікоў корманарыхтовачнага звяна і ўручыць заслужаныя ўзнагароды – дыпломы і грашовыя падарункі лепшым работнікам раёна.
Адным з лідараў раёна па тэрмінах завяршэння касавіцы і нарыхтоўцы кармоў з траваў першага ўкосу з’яўляецца ААТ “Граніт-Агра”. У ходзе прыемнай сустрэчы з работнікамі гаспадаркі Уладзімір Казак павіншаваў аднаго з лепшых механізатараў прадпрыемства Дзмітрыя Болтача, які сёлета быў задзейнічаны на зялёным жніве і па выніках сваёй працы прызнаны пераможцам раённых спаборніцтваў па касьбе траваў першага ўкосу.
Дзмітрый Анатольевіч зрабіў важкі асабісты ўклад у раённы запас кармавой базы. Па стане на 25 чэрвеня раённы рэкорд па касьбе дзякуючы спраўнаму механізатару дасягнуў рубяжа ў 977 гектараў.
Дзмітрый Болтач працуе ў гаспадарцы ўжо шэсць гадоў, акрамя касьбы, задзейнічаны і на іншых сезонных аграэтапах: культывацыі глебы, ворыве, сяўбе.
З перамогай стараннага працаўніка ў гэты дзень павіншавалі жонка Наталля і двое яго дзетак – дачушка Ксенія і сын Кірыл, а таксама калегі па працы.
Яшчэ адна прыемная сустрэча адбылася на палетках КСУП “Жукоўшчына”. Тут старшыня райкама прафсаюза работнікаў АПК павіншаваў з перамогай у раённым спаборніцтве на падборы сянажнай масы ў ходзе нарыхтоўкі кармоў з траваў першага ўкосу механізатара сельгасарганізацыі Юрыя Варгана.
Юрый Аляксандравіч працуе ў гаспадарцы ўжо 14 гадоў, акрамя нарыхтоўкі кармоў, задзейнічаны на сезонных веснавых і восеньскіх работах па вывазе арганікі і сяўбе.
Па стане на 25 чэрвеня на падборы зялёнай масы Юрый Варган дасягнуў раённага рэкорду ў 5723 тоны і тым самым унёс значны асабісты ўклад у працэс нарыхтоўкі кармоў.
Акрамя старшыні райкама прафсаюза работнікаў АПК, у гэты дзень Юрыя Варгана з перамогай павіншавалі калегі па працы, а таксама жонка Вольга і тры дачушкі – Варвара, Ульяна і Вікторыя.
Першы ўкос траў у гаспадарках раёна ўжо падыходзіць да завяршэння, аднак работы па нарыхтоўцы кармоў працягваюцца, актыўна вядуцца работы па нарыхтоўцы сена.
Аксана АНДАЛЮКЕВІЧ
