У Мастах прайшло першынство вобласці па валейболе сярод юнакоў 2003-2005 гадоў нараджэння ў праграме спартакіяды па месцы жыхарства.
Паспяхова выступіла на спаборніцтвах каманда нашага раёна. Яна стала сярэбраным прызёрам вобласці сярод 18 каманд.
У склад зборнай каманды ўвайшлі хлопчыкі з чатырох установаў адукацыі: Наваельнянскай сярэдняй школы (Уладзімір Майсюк, Раман Лебедзь), Круцілавіцкага дзіцячага сада-сярэдняй школы (Мікіта Кучынскі), Хвінявіцкага дзіцячага сада-сярэдняй школы (Раман Вашкевіч, Кірыл Емяльянчык, Аляксей Русін, Уладзіслаў Лябецкі) , Вензавецкага дзіцячага сада-сярэдняй школы (Уладзімір Ківуля).
Турнір праходзіў у некалькі этапаў. На групавым этапе каманда з Дзятлава выступала ў групе “Б”, дзе сапернікамі ёй сталі каманды Мастоўскага, Астравецкага, Свіслацкага і Шчучынскага раёнаў. З лікам 2 : 0 па партыях былі абыграны Свіслацкі і Астравецкі раёны. Больш напружанай была гульня са Шчучынскай камандай, але зноў перамога – 2 : 1. Толькі ў апошнім спаборніцтве з гаспадарамі пляцоўкі нашы хлопцы саступілі – 0 : 2.
У фінальным крузе сапернікамі дзятлаўчан сталі каманды Воранаўскага, Карэліцкага і Ашмянскага раёнаў. Усе яны былі разгромлены з лікам 2 : 0 па партыях.
Выніковы склад прызёраў вобласці:
1-е месца – Гродзенскі раён,
2-е месца – Дзятлаўскі раён,
3-е месца – Кастрычніцкі раён горада Гродна.
Аляксандр БЕЛАВУС,
інструктар-метадыст фізкультурна-спартыўнага клуба
