Кіраўнік Дзятлаўскай РАС ДТСААФ Валянцін Варабей узнагароджаны пераходзячым кубкам і дыпломам за перамогу ў намінацыі конкурсу “Чалавек года ДТСААФ-2018”, папоўнілі скарбонку ўласных перамог і работнікі раённай арганізацыйнай навучальнай структуры.
Сталічны Палац культуры ветэранаў сустракаў дэлегатаў ІІ пленума Цэнтральнага савета ДТСААФ.
У ім прынялі ўдзел прадстаўнікі дэлегацыі з Расійскай Федэрацыі на чале са старшынёй ДТСААФ Расіі генерал-палкоўнікам запасу Аляксандрам Калмаковым, прадстаўнікі міністэрстваў і ведамстваў Рэспублікі Беларусь, старшыні грамадскіх аб’яднанняў і арганізацый.
У ходзе сустрэчы прайшло падвядзенне вынікаў дзейнасці абароннага Таварыства за 2018 год, былі абвешчаны лепшыя калектывы і супрацоўнікі, узнагароджаны пераможцы абласных арганізацыйных структур ДТСААФ, пераможцы спаборніцтваў па відах дзейнасці і пераможцы конкурсу “Чалавек года ДТСААФ-2018” па намінацыях.
Пераходзячым кубкам і дыпломам за перамогу ў намінацыі конкурсу “Чалавек года ДТСААФ-2018” узнагароджаны старшыня Дзятлаўскай раённай арганізацыйнай структуры ДТСААФ Валянцін Варабей.
Граматамі за значны ўклад у развіццё ДТСААФ, поспехі ў працоўнай дзейнасці ў 2018 годзе, праяўленую пры гэтым стараннасць у працы ўзнагароджана выкладчык Людміла Вайтовіч і майстар вытворчага навучання кіравання механічным транспартным сродкам Дзмітрый Асіпук.
Не першы год нязменна высокія вынікі ў падрыхтоўцы (перападрыхтоўцы) вадзіцеляў дэманструе Дзятлаўская РАС ДТСААФ , пастаянна ўтрымліваючы першынство па якасці навучання ў раёне і вобласці, якое выяўляецца ў высокім працэнце здачы з першага разу экзаменаў на атрыманне вадзіцельскага пасведчання. Значыць, маладыя вадзіцелі тут атрымліваюць сапраўды добрыя веды і выходзяць на дарогу не дылетантамі, а падрыхтаванымі прафесіяналамі. Аб гэтым сведчаць і вынікі работы калектыву.
Для павышэння ўзроўню падрыхтоўкі вадзіцеляў калектывам работнікаў створаны адпаведныя ўмовы.
У мінулым годзе быў уведзены ў эксплуатацыю новы адміністрацыйны будынак, актыўна вялася праца па абнаўленні вучэбна-матэрыяльнай базы. Для правядзення вучэбных заняткаў па тэарэтычных прадметах абсталяваны сучасныя класы, насычаныя інфармацыйнымі матэрыяламі, камп’ютарамі і мультмедыйнымі прыладамі. Для правядзення заняткаў па навучанні кіраванню МТС маюцца аўтадромы.
Дзятлаўская структура ДТСААФ укамплектавана кваліфікаванымі кадрамі.
– Дзятлаўская РАС ДТСААФ заснавана ў 50-х гадах ужо мінулага стагоддзя. На працягу ўсяго часу яе сцены пакінулі тысячы выпускнікоў. У нашы дні іх агульная колькасць у год складае каля 300 чалавек. У нашым калектыве працуюць майстры вытворчага навучання кіраванню МТС і выкладчыкі, якія прысвяцілі сваёй справе ўжо не адзін год. Жыхары Дзятлаўскага раёна і прылеглых раёнаў хочуць атрымаць глыбокія тэарэтычныя веды і выдатныя навыкі кіравання аўтамабілем, таму і выбіраюць менавіта наш ДТСААФ. Таксама сюды прыходзяць нашы былыя выпускнікі, каб прайсці навучанне па перападрыхтоўцы на іншыя катэгорыі, – адзначаюць работнікі РАС ДТСААФ.
Менавіта дзякуючы працы гэтых людзей тысячы маладых людзей знаходзяць сваё месца ў жыцці, тысячы грамадзян паспяхова асвойваюць навыкі кіравання аўтамабілем.
Дзятлаўская РАС ДТСААФ праводзіць мерапрыемствы патрыятычнай і спартыўнай накіраванасці, у якіх прымаюць удзел дзясяткі юнакоў і дзяўчат, ветэраны вайны і воіны-інтэрнацыяналісты, будучыя вайскоўцы.
Сёння арганізацыйныя структуры ДТСААФ нашай краіны адзначаюць сваё прафесійнае свята. Віншуем работнікаў Дзятлаўскага РАС ДТСААФ з адметнымі прафесійнымі перамогамі, жадаем усім моцнага запалу і энергічнага настрою ў дасягненні новых пастаўленых вяршынь.
Таксама з прафесійным святам віншуем членаў арганізацыі і выпускнікоў Дзятлаўскай РАС ДТСААФ.
Аксана АНДАЛЮКЕВІЧ
