2019 год – юбілейны для фінансістаў нашай краіны. 7 студзеня адзначаецца 100-годдзе стварэння Міністэрства фінансаў і фінансавай сістэмы Беларусі.
За гэты час структура фінансавага аддзела неаднаразова мянялася. Цяпер тут працуюць высокакваліфікаваныя спецыялісты з вышэйшай эканамічнай адукацыяй.
Асноўныя задачы фінансавага аддзела – вядзенне бюджэтна-фінансавай і падатковай палітыкі, рэгуляванне і каардынацыя дзейнасці ў сферы фінансаў органаў мясцовага кіравання і самакіравання Дзятлаўскага раёна.
Яны паспяхова выконваюцца, дзякуючы кампетэнтным спецыялістам, якія працуюць і працавалі ў аддзеле. Многія з іх не адзін дзясятак гадоў аддалі фінансавай сістэме.
Каля 40 гадоў адпрацавала ў фінансавых органах Валянціна Літвіна (Ляўковіч), з іх 28 – на пасадзе загадчыцы. Яна ўзнагароджана медалём “За доблесную працу”, неаднаразова адзначалася Ганаровымі граматамі.
З лютага 1997 года па снежань 2003-га фінансавы аддзел ўзначальвала Алена Фабішэўская.
Працоўны стаж у фінансавых органах Ганны Лябецкай – звыш 27 гадоў, каля 24 з іх – на пасадзе галоўнага бухгалтара. За працоўныя поспехі яна ўзнагароджана Ганаровай граматай Міністэрства фінансаў БССР, медалём “Ветэран працы”.
Больш за 15 гадоў галоўным бухгалтарам фінансавага аддзела працавала Яўгенія Вішнярэўская.
Данута Ёда каля 34 гадоў займала розныя пасады, 11 з іх – узначальвала інспекцыю планавання і эканамічнага аналізу. Узнагароджана медалём “За працоўную адзнаку”, неаднаразова атрымлівала Ганаровыя граматы.
Ядвіга Купрацэвіч 35 гадоў была эканамістам па фінансаванні народнай гаспадаркі, затым галоўным эканамістам бюджэтнай інспекцыі. Узнагароджана знакам “Выдатнік фінансавай сістэмы”.
Звыш 29 гадоў працоўнага стажу ў Рыгора Сцепанішчава. Ён быў кантралёрам-рэвізорам кантрольна-рэвізійнага ўпраўлення, інспектарам дзярждаходаў, эканамістам інспекцыі па планаванні.
Уся працоўная дзейнасць Святланы Грэйня (38 гадоў) звязана з фінаддзелам Дзятлаўскага райвыканкама. Сюды яна прыйшла пасля тэхнікума ў 1975 годзе, а ў 2013-ым выйшла на пенсію, адпрацаваўшы на пасадах інспектара па бюджэце, эканаміста бюджэтнай інспекцыі, эканаміста аддзела даходаў і выканання бюджэту.
На пасадзе галоўнага эканаміста каля 7 гадоў курыравала сферу фінансавання аграпрамысловага комплексу Надзея Зубкова.
На працягу 36 гадоў Ядвіга Шалесная апрацоўвала карэспандэнцыю і вяла справаводства, працуючы на пасадзе сакратара-машыністкі, а затым старшага інспектара.
Значны ўклад у дзейнасць фінансавага аддзела ўнеслі Казімір Максімчык, Ларыса Аверкава, Тамара Мацюкевіч, Людміла Васюкевіч, Марыя Татарчык, Іван Гірык, якія прадоўжылі працоўную дзейнасць у падатковых органах раёна.
Цяпер фінансавы аддзел Дзятлаўскага райвыканкама – самастойнае структурнае падраздзяленне, якое падпарадкоўваецца раённаму выканаўчаму камітэту і фінансаваму ўпраўленню Гродзенскага абласнога выканаўчага камітэта. Штатная колькасць работнікаў складае 8 чалавек. Больш за 15 гадоў аддзел узначальвае Ірына Жэгала. Пад яе кіраўніцтвам ажыццяўляецца складанне і выкананне бюджэту раёна, выкананне бюджэтнага заканадаўства, забеспячэнне мэтавага і эфектыўнага выкарыстання бюджэтных сродкаў.
Арганізоўвае і ажыццяўляе работу па складанні праекта бюджэту і выкананні бюджэту раёна намеснік начальніка Таццяна Урбановіч. Улік выканання каштарысу расходаў на ўтрыманне апарата фінансавага аддзела і кантроль за вядзеннем бухгалтарскага ўліку па мясцовым бюджэце ажыццяўляе галоўны бухгалтар Раіса Лазута. Больш за 28 гадоў працуе ў фінансавай сістэме Вольга Саракульская. Сярод яе прафесійных абавязкаў – кантроль за паступленнем даходаў у бюджэт раёна. Звыш 21 года працоўнай дзейнасці ў фінансавым аддзеле ў Веры Снітко. На пасадзе галоўнага спецыяліста яна ажыццяўляе кантроль за фінансаваннем расходаў па ўстановах адукацыі. Работу, скіраваную на забеспячэнне выканання даходнай часткі бюджэту ажыццяўляе Святлана Каско. Галоўны спецыяліст Ірына Бубноўская забяспечвае кантроль за фінансаваннем установаў аховы здароўя. Вядучы бухгалтар Ганна Жых арганізуе работу па спагнанні сумаў у даход дзяржавы па выканаўчых дакументах (гэта новая для фінансавага аддзела функцыя).
Фінансавая сістэма – складаная і дынамічная галіна эканомікі. У гэту службу прыходзяць людзі, якія валодаюць стратэгічным мысленнем, не баяцца нялёгкіх задач, настойлівыя ў пошуках лепшых рашэнняў. Ад кіраўніцтва раёна – далейшай вам стойкасці, мудрасці, аптымізму, шаноўныя фінансісты, дабрабыту і поспехаў у нялёгкай справе, сямейнага шчасця, здароўя і працвітання.
Ірына СТЫРНІК
