Не сакрэт, што дзе б чалавек ні знаходзіўся, яго заўсёды цягне дадому.
Асабліва гэта адчуваюць ваеннаслужачыя тэрміновай службы. Так, армія хоць і дае пэўныя навыкі і магчымасці жадаючым, але вяртанне да сям’і, сяброў, звыклага жыцця чакае кожны салдат.
Армія – гэта школа жыцця. Там дастаткова часу, каб у многім разабрацца, асэнсаваць, шмат чаму навучыцца. А гэта не толькі вытрыманасць, вынослівасць, самадысцыпліна, уменне падпарадкоўвацца іншым і выконваць загады. Армія – школа самастойнасці.
Галоўнае ў нясенні службы – выкананне задач па прызначэнні, вучоба, авалоданне вайсковымі спецыяльнасцямі. Салдат вучыцца пастаянна. У першы месяц пасля прызыву ён асвойвае азы вайсковай навукі, страявую падрыхтоўку. Потым пачынаецца тэарэтычнае вывучэнне спецыяльнасці, а ў далейшым ідзе замацаванне, адточванне ўменняў і навыкаў.
20 лістапада для пастаноўкі на воінскі ўлік ў ваенны камісарыят Дзятлаўскага раёна прыбылі шэсць салдат, якія дэмабілізаваліся з 74-га асобнага палка сувязі Заходняга аператыўнага камандавання. Тут іх сустракалі бацькі і родныя. Са словамі прывітання да юнакоў звярнуўся ваенны камісар Дзятлаўскага раёна Генадзь Суравец:
– Гэты год з’яўляецца юбілейным, мы адсвяткавалі 100-годдзе Узброеных Сіл. Менавіта ў гэтым годзе мы ўводзім традыцыю ўрачыста сустракаць ваеннаслужачых, якія выдатна адслужылі, дэмабілізаваліся і прыбылі на пастаноўку на ўлік. Хачу сказаць вам дзякуй, за тое, што выканалі свой абавязак дастойна.
Асабліва былі адзначаны два ваеннаслужачыя – радавыя Ягор Залеўскі і Дзяніс Якаўчык.
Ягор атрымаў грамату за разумную ініцыятыву, стараннасць і адзнаку па службе пры выкананні сваіх службовых абавязкаў.
У арміі есць такі від заахвочвання, як фатаграфія салдата каля разгорнутага Баявога Сцяга воінскай часц. Баявы Сцяг – сімвал воінскага гонару, доблесці і славы, ён з’яўляецца напамінам кожнаму ваеннаслужачаму аб свяшчэнным абавязку аддана служыць Радзіме, абараняць яе мужна і ўмела. Дзяніс першы на Дзятлаўшчыне за шмат гадоў, хто атрымаў такое фота.
Генадзь Суравец падзякаваў бацькам юнакоў, якія выхавалі, падрыхтавалі надзейных маладых людзей.
Камісар пажадаў хлопцам знайсці сваю дарогу ў жыцці і з поспехам крочыць па ёй.
Вольга ЮШКЕВІЧ
