У Беларусі з лютага бягучага года ўзрастуць дапамогі па доглядзе дзіцяці ва ўзросце да 3 гадоў, паведамілі карэспандэнту БЕЛТА ў аддзеле народанасельніцтва, гендарнай і сямейнай палітыкі Міністэрства працы і сацыяльнай абароны.
У адпаведнасці з законам «Аб дзяржаўных дапамогах сем’ям, якія выхоўваюць дзяцей» з 1 студзеня 2013 года памер штомесячнай дапамогі па доглядзе дзіцяці ва ўзросце да 3 гадоў дыферэнцыруецца ў залежнасці ад колькасці дзяцей у сям’і. На першае дзіця ён складае 35 працэнтаў сярэднямесячнай заработнай платы работнікаў рэспублікі, на другое і наступных дзяцей — 40 працэнтаў. Пры выхаванні ў сям’і дзіцяці-інваліда дапамога назначаецца і выплачваецца ў памеры 45 працэнтаў сярэднямесячнай заработнай платы незалежна ад чарговасці нараджэння гэтага дзіцяці ў сям’і.
Для разліку памеру гэтага віду дапамогі з 1 лютага па 30 красавіка бягучага года прымяняецца паказчык сярэднямесячнай заработнай платы за чацвёрты квартал 2015 года ў памеры Br7 млн 1 тыс. 336 (за трэці квартал 2015 года гэты паказчык быў Br6 млн 953 тыс. 494). Такім чынам, з лютага па красавік 2016 года памер штомесячнай дапамогі па доглядзе дзіцяці ва ўзросце да 3 гадоў складзе на першае дзіця Br2 млн 450,5 тыс. (з лістапада мінулага года па студзень бягучага года — Br2 млн 433,7 тыс.), на другое і наступных дзяцей — Br2 млн 800,5 тыс. (цяпер — Br2 млн 781,4 тыс.), на дзіця-інваліда ва ўзросце да 3 гадоў — Br3 млн 150,6 тыс. (цяпер Br3 млн 129,1 тыс.).
Грамадзянам, якія пражываюць на тэрыторыі радыеактыўнага забруджвання ў зоне далейшага адсялення або з правам на адсяленне, дапамога па доглядзе дзіцяці ва ўзросце да 3 гадоў назначаецца і выплачваецца ў памеры 150 працэнтаў ад памераў, устаноўленых законам.
Пасля зацвярджэння пастановай міністэрства бюджэту пражытачнага мінімуму ў сярэднім на душу насельніцтва (БПМ) на перыяд з 1 лютага па 30 красавіка стануць вядомы памеры астатніх відаў дзяржаўных дапамог сем’ям, якія выхоўваюць дзяцей.
