Зроблена шмат, але і ад насельніцтва чакаюць ініцыятывы

У час прамой тэлефоннай лініі, якую праводзіў член Савета Рэспублікі Нацыянальнага сходу Рэспублікі Беларусь, дэпутат Гродзенскага абласнога Савета дэпутатаў Андрэй Жамойда, да яго звярнулася жыхарка вёскі Боцкавічы.

Пытанні жанчыны тычыліся добраўпарадкавання могілак вёскі Ахонава і стану дарогі, якая злучае вёскі Боцкавічы і Яцукі.

Падрабязна аб рабоце па добраўпарадкаванні аб’ектаў і тэрыторый агульнага карыстання ў Данілавіцкім сельскім савеце расказаў старшыня сельвыканкама Ігар Кухарэвіч:

– У 2022-2023 гадах на могілках вёскі Ахонава было выдалена каля сотні дрэваў, і гэта без уліку хмызнякоў, ад якіх таксама расчышчалася тэрыторыя. Прычым не ўсе спілаваныя дрэвы былі аварыйныя, бо ажыццяўлялася комплексная высечка. Адзначу, што на могілках сельсавета кожны год праводзіцца расчыстка ад хмызнякоў і расліннасці. У 2025 годзе работнікамі сельвыканкама сумесна са спецыялістамі Дзятлаўскага РУП ЖКГ было праведзена абследаванне па выяўленні аварыйных дрэваў, якія пагражаюць помнікам, у тым ліку на могілках вёскі Ахонава. Усе аб’екты расліннасці, якія ўяўляюць небяспеку, у перспектыве будуць спілаваны будаўнічымі альпіністамі. Хачу спыніцца і на такіх пытаннях добраўпарадкавання пагостаў, як своечасовы вываз смецця, абкошванне травы, бо яны таксама хвалююць вяскоўцаў, таму сельскі выканаўчы камітэт надае ім не менш увагі. Нараканняў ад насельніцтва ў гэтым плане не паступала.

Сёлета альпіністы працавалі на могілках у Стараельні, на наступны год такія работы таксама запланаваны на іншых пагостах: у камунгасе ёсць спіс дрэваў, якія належыць выдаліць як аварыйныя. Адзначу, што сур’ёзнай пагрозы на сёння для помнікаў і пахаванняў з-за падобных аб’ектаў расліннасці няма, праблема вырашаецца паступова і планава. Увогуле, навядзенню парадку на могілках надаецца вялікая ўвага, на гэта выдзяляюцца значныя сумы бюджэтных сродкаў. Аднак і самі людзі, продкі якіх пахаваны на вясковых могілках, павінны праяўляць сумленнасць. Беларускае заканадаўства гэта прадугледжвае: згодна з законам аб пахаванні, даглядаць магілы блізкіх і прылеглыя да іх тэрыторыі павінны грамадзяне. Сельвыканкам заўжды вітае і адгукваецца на ініцыятывы насельніцтва па навядзенні парадку на культавых аб’ектах, правядзенні суботнікаў.

Своечасова сельвыканкам рэагуе і на пытанні аб рамонце і грэйдзіраванні вуліц і дарог, грунтоўную падтрымку ў гэтым аказваюць ДРБУ-119 і Дзятлаўскае РУП ЖКГ. Сёлета ў Год добраўпарадкавання зроблена нямала: заасфальтавана каля пяці кіламетраў дарогі, якая злучае вёскі Касцюкі і Лапушна. Ажыццяўляецца выдаленне расліннасці ўздоўж праезнай часткі і капітальная падсыпка гравійнай сумессю дарогі ад аграгарадка Таркачы да вёскі Марозавічы, а потым такія ж работы запланаваны на дарозе да вёскі Боцкавічы. Падсыпаны ўчасткі на дарогах у напрамках на Карыцу-2, Лапушна, у Навасёлках вуліца Шашэйная, а ў аграгарадку Круцілавічы – Рачная.

Зразумела, што ў міжсезонне дарожныя ўмовы не заўсёды ідэальныя, аднак пытанням добраўпарадкавання мы надаём і будзем надаваць шмат увагі. Усе яны на пастаянным кантролі органаў мясцовай улады і паступова вырашаюцца. Аб’ёмы выкананых работ, у тым ліку за бюджэтныя сродкі, сапраўды ўнушальныя. 

Ірына СТЫРНІК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga