Зазірнём у сямейны альбом: цёплая сустрэча ў Жукоўшчыне

Чытачы Жукоўшчынскай сельскай бібліятэкі-клуба прынялі ўдзел у гадзіне ўспамінаў “Зазірнём у сямейны альбом”. Спецыяльна да сустрэчы бібліятэкар падрыхтавала кранальныя фотакалажы “Якія маладыя мы былі” і “Гады ляцяць, нібы птушкі”. Фатаграфіі – гэта ўнікальная магчымасць здзейсніць падарожжа на шмат гадоў таму назад, маленькія гісторыі, зафіксаваныя з дапамогай манахромных стоп-кадраў.

Удзельнікі сустрэчы прынеслі з сабой уласныя сямейныя фотаальбомы. Старыя здымкі – не проста кавалачкі паперы, а магчымасць падзяліцца сваім жыццёвым вопытам з роднымі, сябрамі і знаёмымі.

Гартаючы альбомы, госці дзяліліся ўспамінамі аб самых важных момантах: бесклапотных школьных і студэнцкіх гадах; хвалюючых днях вяселля; нараджэнні дзяцей і сямейных юбілеях; працоўных буднях і дасягненнях.

Разглядаючы партрэты, удзельнікі з асаблівай пяшчотай і светлым смуткам узгадвалі блізкіх людзей, якія ўжо пайшлі з жыцця, але назаўжды засталіся жыць у памяці сэрца.

Сямейная сустрэча не абышлася і без займальнага інтэрактыву. Госці з задавальненнем уключыліся ў камандную гульню “Хронафота”, дзе трэба было адгадаць дакладны або прыблізны год нараджэння таго ці іншага здымка. Не менш азартнай стала гульня “Хто больш?”: удзельнікі спрабавалі пазнаць і назваць як мага больш імёнаў членаў сям’і на старых фатаграфіях сваіх суседзяў па лаўцы.

Сустрэча яскрава даказала, што сама эстэтыка сямейнага альбома, старыя фатаграфіі, якія здолелі перажыць час, а таксама гісторыя асобнага роду і ўсёй краіны не могуць пакінуць чалавека абыякавым.

Наталля ВАЙТУШКА,
бібліятэкар Жукоўшчынскай бібліятэкі

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga