“Залатая шайба” вызначыла мацнейшых

Упершыню за 11 гадоў правядзення раённых спаборніцтваў па хакеі “Залатая шайба” ў старэйшай узроставай групе чэмпіёнам стала дружына сярэдняй школы №1 горада Дзятлава. У напружанай барацьбе, па булітах, яны вырвалі перамогу ў казлоўшчынскіх хакеістаў з вынікам 2:1.

У старэйшай узроставай групе на сёмых па ліку раённых спаборніцтвах па хакеі “Залатая шайба” (у 2007-м, 2008-м, 2011-м і 2015-м чэмпіянат не праводзіўся) за званне лепшых змагаліся каманды шасці школ раёна – гімназіі №1 горада Дзятлава, сярэдніх школаў №1 і №3 горада Дзятлава, Казлоўшчынскай, Гезгалаўскай і Наваельнянскай сярэдніх школаў.

Нязменны чэмпіён спаборніцтваў “Залатой шайбы” ўсіх мінулых гадоў, сярэдняя школа №3 (фота 1) горада Дзятлава, сёлета толькі чацвёртая. Не атрымаўшы ніводнага паражэння, з другім вынікам у падгрупе па розніцы забітых і прапушчаных шайбаў аднак спынілася на трэцім радку каманда Гезгалаўскай сярэдняй школы. З папярэдняй сумай 4 і 3 ачкоў (11 і 17 забітых шайбаў) адпаведна ў фінальным матчы згулялі дружыны Казлоўшчынскай сярэдняй школы (фота 2) і сярэдняй школы №1 горада Дзятлава. Асноўны час гульні не вызначыў пераможцу – 1:1, аднак у дадатковы час дзятлаўчане па булітах вырвалі перамогу ў сваіх сапернікаў з Казлоўшчыны – 2:1. Лепшымі бамбардзірамі спаборніцтваў сталі Вадзім Кухарэвіч з Дзятлава – 7 закінутых шайбаў і Вадзім Любчанка з Казлоўшчыны, на рахунку якога 5 забітых шайбаў.

Эстафету “Залатой шайбы” ад старшакласнікаў прынялі спартсмены сярэдняй узроставай групы, якія гэтымі днямі змагаюцца за званне лепшых хакеістаў раёна.

Н. АВЯРЧУК
Фота аўтара