З Адзінага дня інфармавання насельніцтва

У час правядзення Адзінага дня інфармавання насельніцтва, які праходзіў у жніўні 2015 года ў Дзятлаўскім раёне, паступілі наступныя пытанні.

Пытанне: ці будуць створаны і абсталяваны дзіцячыя пляцоўкі ў пасёлку Гезгалы?

Адказ дырэктара Дзятлаўскага РУП ЖКГ С. Луні: на тэрыторыі пасёлка Гезгалы ёсць адна дзіцячая пляцоўка, якая размешчана перад жылымі дамамі №7 і №10. З-за недахопу грашовых сродкаў у гэтым годзе стварэнне дзіцячых пляцовак у пасёлку не плануецца.

Пытанне: па якой прычыне слабы напор вады ў жылых дамах у аграгарадку Раклевічы?

Адказ старшыні СВК “Русь-Агра” А. Караля: з-за ўмоваў надвор’я водазабор у аграгарадку Раклевічы быў павялічаны ў сувязі з паліваннем агародаў. Цяпер напор вады ў жылых дамах адноўлены.
Пытанне: чаму змяніўся графік работы аддзялення паштовай сувязі ў аграгарадку Раклевічы?
Адказ начальніка раённага вузла паштовай сувязі Н. Цітовай: з 1 верасня 2015 года пункт паштовай сувязі Раклевічы працуе па наступным графіку: з 8.30 да 15.00, перапынак на абед з 10.30 да 12.30. У суботу – з 8.30 да 12.30 без перапынку на абед.

Пытанне: чаму дрэннае абслугоўванне насельніцтва і малы асартымент тавараў у прамысловым магазіне ў паселку Гезгалы?

Адказ дырэктара Дзятлаўскага філіяла Гродзенскага абласнога спажыўтаварыства В. Кончыка: згодна з асартыментным пералікам, у магазіне “Руно” пасёлка Гезгалы ёсць усе тавары. А тавары, якія не ўключаны ў асартыментны пералік, прадаюцца па папярэдніх заказах.
Асартыментны пералік распрацаваны на падставе пераліку тавараў, якія належаць уключэнню суб’ектамі гандлю ў асартыментныя пералікі тавараў для неспецыялізаваных магазінаў са змешаным асартыментам тавараў, размешчаных у сельскіх населеных пунктах і пасёлках гарадскога тыпу (дадатак 7 да пастановы Міністэрства гандлю Рэспублікі Беларусь 8.05.2014 №20 (у рэдакцыі пастановы Міністэрства гандлю Рэспублікі Беларусь 17.04.2015 №15)).

У сувязі з нізкімі аб’ёмамі тавараабароту і адпаведна незабеспячэннем нагрузкі на аднаго работніка прылаўка зменены рэжым работы магазіна. З 1 жніўня 2015 года магазін працуе па наступным графіку: аўторак, серада, пятніца, субота з 11 да 16 гадзін (панядзелак, чацвер, нядзеля – выхадныя).

Аддзел ідэалагічнай работы, культуры і па справах моладзі Дзятлаўскага райвыканкама