Ярмошына: заклікі да байкоту выбараў гучаць з боку няўдачнікаў

Заклікі да байкоту выбараў гучаць з боку няўдачнікаў, заявіла сёння кіраўнік Цэнтрвыбаркама Лідзія Ярмошына ў праграме «Актуальны мікрафон» на Першым нацыянальным канале Беларускага радыё, перадае карэспандэнт БЕЛТА.

Гаворачы аб закліку да байкоту прэзідэнцкіх выбараў, старшыня ЦВК, у прыватнасці, адзначыла: «Гэта забаронена заканадаўствам, але, тым не менш, у той ці іншай форме такія заклікі гучаць. Яны гучаць з боку няўдачнікаў».

Паводле слоў Лідзіі Ярмошынай, такую рыторыку можна пачуць ад аднаго з няздзейсненых кандыдатаў на вышэйшую дзяржаўную пасаду (удзельнічаў у выбарчай кампаніі ў 2015 годзе) і яшчэ некалькіх прадстаўнікоў апазіцыі, якія «не могуць удзельнічаць у выбарах па тых ці іншых прычынах або не хочуць гэтага». «Я адразу магу сказаць, што гэта не толькі незаконна, гэта безадказна. Дарослыя людзі, якія вельмі добра ведаюць, што правядзенне выбараў — неабходнасць для кожнай дзяржавы, ведаюць, якія вялікія сродкі ўкладзены ў гэту выбарчую кампанію (як і ў любую іншую) і што ад выбараў залежыць стабільнасць і дабрабыт нашага грамадства, яны проста не маюць права да такой ступені забыцца, страціць пачуццё рэальнасці і адказнасці, каб заклікаць не прыходзіць на выбары», — лічыць старшыня ЦВК.

Яна таксама дадала, што перадвыбарная агітацыя ідзе ў планавым рэжыме — праводзяцца пікеты, сустрэчы з выбаршчыкамі ў закрытых памяшканнях, кандыдаты змаглі выступіць на радыё і тэлебачанні, апублікавалі ў сродках масавай інфармацыі свае перадвыбарныя праграмы. «Кандыдаты працуюць, яны прымушаюць выбаршчыкаў гаварыць аб сабе, у добрым сэнсе гэтага слова. Тая агітацыя, якая ёсць у нашай краіне, наогул не пакідае ніводнага выбаршчыка без дастатковай інфармацыі аб тым, што 11 кастрычніка адбудуцца выбары Прэзідэнта», — лічыць Лідзія Ярмошына.