У сакавіку супрацоўнікі раённага цэнтра гігіены і эпідэміялогіі праводзілі ацэнку выканання санітарна-эпідэміялагічных патрабаванняў 11 гандлёвымі аб’ектамі, размешчанымі на тэрыторыі Дзятлаўскага раёна, па пытаннях захавання заканадаўства ў галіне санітарна-эпідэміялагічнага дабрабыту насельніцтва, гігіенічных патрабаванняў па ўтрыманні магазінаў і ўмоваў захоўвання харчовай прадукцыі.
Парушэнні заканадаўства ўстаноўлены на ўсіх абследаваных аб’ектах, на некаторых выяўляюцца сістэматычна. У асноўным яны звязаны з абарачэннем харчовай прадукцыі без наяўнасці маркіроўкі з інфармацыяй, якая наносіцца ў адпаведнасці з патрабаваннямі Тэхнічных рэгламентаў Мытнага саюза, Еўразійскага эканамічнага саюза (прыпынена рэалізацыя 69,7 кг), рэалізацыяй харчовай прадукцыі з парушэннем умоваў захоўвання (прыпынена рэалізацыя 74,9 кг), выяўленнем прадукцыі са скончаным тэрмінам прыдатнасці (знята з рэалізацыі 21,6 кг прадукцыі).
Таксама часта выяўляліся парушэнні, звязаныя з эксплуатацыяй абсталявання не ў адпаведнасці з інструкцыяй; устаноўкай цэннікаў непасрэдна на незапакаваную харчовую прадукцыю; рэалізацыяй сырой харчовай прадукцыі і паўфабрыкатаў з яе сумесна з гатовай да ўжывання; захоўваннем у тары з харчовай прадукцыяй гандлёвага інвентара; парушэннем тэмпературнага рэжыму захоўвання прадуктаў; непадтрыманнем належнага санітарнага стану тэрыторыі, прылеглай да гандлёвага аб’екта.
У асноўным парушэнні санітарна-эпідэміялагічных патрабаванняў маюць бягучы характар і не патрабуюць фінансавых затрат, але яны ствараюць пагрозу прычынення шкоды жыццю і здароўю людзей і цягнуць за сабой адміністрацыйную адказнасць згодна з дзеючым заканадаўствам.
Вікторыя СТАРУК,
доктар-гігіеніст Дзятлаўскага райЦГЭ
Фота Святланы ГРЫШЫНАЙ
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
