На Дзятлаўшчыне прадаўжаецца акцыя “Сям’я для кожнага дзіцяці”, скіраваная на папулярызацыю сямейных формаў уладкавання дзяцей, якія засталіся без апекі бацькоў. У час яе спецыялісты расказваюць гісторыі, якія памянялі да лепшага лёсы маленькіх дзятлаўчан.
“Школьныя гады – гэта час адкрыццяў. Кожны дзень прыносіць новыя задачы і пытанні, на якія хочацца знайсці адказы.
У свае адзінаццаць гадоў навучэнец пятага класа Хвінявіцкай сярэдняй школы Сяргей Патыльчак даказаў, што жыццёвыя цяжкасці не перашкода для вялікіх поспехаў.
Сяргей расце ў апякунскай сям’і, дзе яго галоўным настаўнікам, апорай і лепшым сябрам стаў любімы дзядуля. Менавіта ён вучыць хлопчыка быць сумленным, працалюбівым і ніколі не здавацца перад цяжкасцямі. Разам з імі жыве старэйшая сястра Валерыя, сур’ёзная і мэтанакіраваная дзяўчына. Іх невялікая, але дружная сям’я – прыклад сапраўднай узаемнай падтрымкі.
Як ні дзіўна, Сяргею аднолькава лёгка даюцца як дакладныя, так і гуманітарныя навукі. Удзел у алімпіядах дапамагае праверыць сябе, выкарыстаць тое, што вывучыў, і ўбачыць, як шмат яшчэ можна даведацца, а кожнае дасягненне становіцца важным вынікам старанняў і матывам рухацца далей.
У скарбонцы пяцікласніка ўжо нямала набыткаў: перамогі ў алімпіядах, конкурсах раённага ўзроўню, даследчай дзейнасці.
Асаблівае месца ў яго жыцці займае чытанне. Сяргей лічыць, што кніга можа пазнаёміць з далёкімі краінамі і незвычайнымі героямі, расказаць пра мінулае ці дапамагчы лепш зразумець навакольны свет.
Гісторыя Сяргея Патыльчака – аповед аб тым, як унутранае святло, прага да ведаў і любоў блізкіх людзей дапамагаюць упэўнена ісці наперад. Педагогі вераць, што гэтага кемлівага хлопчыка чакае яшчэ шмат адкрыццяў. Можна не сумнявацца, што з такім багажом ведаў і надзейнай апорай у яго вялікая і яркая будучыня”.
Ангеліна КАРОЛЬ,
педагог Хвінявіцкай сярэдняй школы
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
