Як прыняць спадчыну?

Пытанне: у мяне памерла маці.

Пакуль не магу займацца дакументамі, бо жыву ў іншай мясцовасці, аднак чула, што аформіць спадчыну неабходна на працягу 6 месяцаў. Якія будуць наступствы, калі спазнюся звярнуцца да натарыуса?

Адказвае натарыус Гродзенскай натарыяльнай акругі Любоў Аўсіевіч:

– Для афармлення сваіх спадчынных правоў вам неабходна прыняць гэту спадчыну. Для гэтага да заканчэння 6 месяцаў з моманту смерці вашай маці звярнуцца да натарыуса па апошнім месцы яе жыхарства.

Заканадаўца прадугледзеў і іншыя спосабы прыняць спадчыну па заканчэнні тэрміну ў 6 месяцаў. Напрыклад, гэта можа быць сумесная рэгістрацыя з памерлай па адным адрасе. Магчыма ж, вы прымалі меры па захаванні яе маёмасці на працягу гэага паўгода: выплацілі за свой кошт даўгі спадчынадаўцы ці атрымалі ад трэціх асобаў належныя ёй сумы грошай або ажыццяўлялі за свой кошт расходы на ўтрыманне маёмасці.

Калі гэта так, то спадчына была прынята вамі фактычна і часам яе прыняцця вы не абмежаваны.

Калі па нейкіх прычынах за адведзены час спадчына не была прынята, то аднаўляць тэрмін давядзецца ў судовым парадку. Трэба разумець, што нават у выпадку станоўчага вырашэння пытання вы істотна патраціцеся на адваката, судовыя выдаткі. Таму, на мой погляд, лепш пастарацца і паспець своечасова. Такія ж правілы дзейнічаюць нават тады, калі ёсць завяшчанне.

Ірына СТЫРНІК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga