Выстава-кірмаш «Еўрарэгіён «Нёман-2014» прайшла ў Гродне

У Гродне з 4 па 6 верасня праходзіла XVI Рэспубліканская ўніверсальная выстава-кірмаш «Еўрарэгіён «Нёман-2014». Для прадстаўнікоў бізнесу такія сустрэчы ў абласным цэнтры сталі традыцыйнымі. Яны актывізуюць працэс супрацоўніцтва Гродзеншчыны з памежнымі тэрыторыямі суседніх краін, з іншымі рэгіёнамі рэспублікі, нездарма толькі сёлета больш за 200 афіцыйных запрашэнняў былі адасланы ў розныя рэгіёны суседніх краін.

На выставе была шырока прадстаўлена прадукцыя больш чым 150 вытворцаў Гродзенскай вобласці: ад хімічнай да харчовай прамысловасці, машынабудавання, лёгкай прамысловасці. Акрамя экспазіцыі тавараў, на «Еўрарэгіёне» рэкламаваўся рынак паслугаў Гродзеншчыны: інфармацыйных, медыйных, страхавых, турыстычных і іншых. Як налічылі арганізатары выставы-кірмаша, усяго пад экспазіцыі было задзейнічана амаль 1,5 тысячы квадратных метраў выставачных плошчаў.

Сярод удзельнікаў выставы-кірмаша былі і дзятлаўчане: сувенірную прадукцыю сюды прывезлі раённы Дом рамёстваў і Дзятлаўскі гісторыка-краязнаўчы музей. Прадукцыю прадпрыемстваў нашага раёна можна было знайсці сярод экспазіцый выставы УП «Гроднахарчпрам», на якой былі прадстаўлены 8 галіновых прадпрыемстваў вобласці. Тут мы пабачылі стэнды пад маркай «Алгонь» з багатай лінейкай прадукцыі Дзятлаўскага вінна-гарэлачнага завода, а таксама прадукцыю ААТ «Боркаўскі крухмальны завод», АСП «Парэцкі спіртзавод».

Мяса-малочная галіна рэгіёна была прадстаўлена ў экспазіцыі холдынгу «Гроднамясамалпрам». Усіх «малочнікаў» Гродзеншчыны сёлета прадстаўляла Ваўкавыскае ААТ «Беллакт». Прадукцыя «Сырной страны» — ААТ «Дзятлаўскі сыраробны завод» — межавала тут з прадукцыяй малочнай кампаніі «Навагрудскія дары», ААТ «Шчучынскі масласырзавод» і іншымі вытворцамі. Калі мы пацікавіліся менавіта прадукцыяй дзятлаўскіх сыраробаў, нам уручылі прайс-лісток, у якім, акрамя апісання гатункаў сыроў, былі ўсе кантакты завода.

Самастойна сваю прадукцыю на выставе-кірамашы «Еўрарэгіён «Нёман-2014» прэзентавала сумеснае закрытае акцыянернае таварыства «Гродзенскі маслатлушчавы камбінат», які, нягледзячы на назву, працуе на Дзятлаўшчыне, у гарпасёлку Наваельня. Ля стэндаў з прадукцыяй гаспадарылі Ганна Гуліда, інжынер па якасці, і Іна Куроўская, лабарант хімічнага аналізу прадпрыемства. Яны расказалі, што на эканамічным форуме прадпрыемства шырока прадстаўляе сваю прадукцыю — фасованы алей розных відаў: рапсавы, рапсава-сланечнікавы, сланечнікавы, аліўкавы (рафінаваны, нерафінаваны, купажы). Вытворцам ужо паспелі пацікавіцца прадстаўнікі гандлёвых базаў нашай рэспублікі, госці форуму з Польшчы і Расіі. Гаспадары выставы расказалі нам, што ўся прадукцыя камбіната якасная і мае сертыфікаты адпаведнасці.

16 эканамічны форум «Еўрарэгіён «Нёман» прайшоў у пашыраным фармаце. Акрамя непасрэдна выставы-кірмашу ў яго праграму былі ўключаны фестываль піва, інвестыцыйны форум і паказ прадукцыі лёгкай прамысловасці.

Фестываль піва «BEERаснёўскі фэст» быў дэбютным, але стаў сапраўдным святам для жыхароў і гасцей Гродна. У парку імя Ж. Жылібера працавалі падворкі беларускіх вытворцаў піва «Лідскае», «Аліварыя», «Хайнекен», дзе ладзіліся конкурсы, дэгустацыі і продаж не толькі пеннага напою але і розных далікатэсаў: ад смажанак і печыва да каўбасак грыль і шашлыкоў. Свята праходзіла пад жывую музыку: на сцэне выступалі cover-band’ы з Гродна і Мінска. Фестываль атрымаў назву «BEERаснёўскі фэст» і павінен стаць традыцыйным мерапрыемствам пачатку восені.

У межах выставы-кірмаша «Еўрарэгіён «Нёман-2014» таксама прайшло пленарнае пасяджэнне інвестыцыйнага форуму «Гродзеншчына на скрыжаванні межаў», працавала выстава інвестпраектаў.

Дэманстрацыя прадукцыі лепшых прадпрыемстваў лёгкай прамысловасці GrodnoFashіonDay адбылася ў моладзевым цэнтры “Галактыка” горада Гродна. Паралельна з паказам ладзілася цырымонія ўшанавання пераможцаў штогадовага конкурсу «Лепшы прадпрымальнік Гродзенскай вобласці-2014».

Сёлетні эканамічны форум стаў яшчэ больш цікавым і відовішчным і, здаецца, не пакінуў раўнадушнымі сваіх наведвальнікаў.

Іріна КАЎКЕЛЬ

Фота Наталлі АВЯРЧУК