Умець на “выдатна”, але не прымяняць у жыцці

Такое пажаданне ўдзельнікам штогадовага агляду-конкурсу добраахвотных пажарных і санітарных дружын адрасаваў намеснік старшыні райвыканкама Дзмітрый Баравік.

Сёлета ў ім паспаборнічалі сталі 11 каманд сельгаспрадпрыемстваў і арганізацый раёна. На працягу года яны рыхтаваліся да выпрабаванняў, павышалі свае веды, адточвалі навыкі, выпраўлялі мінулагоднія недахопы, каб быць лепшымі.

– У гэтым годзе на Дзятлаўшчыне праходзілі абласныя вучэнні МНС, у час якіх наш раён паказаў зладжанасць дзеянняў і добры вынік. Жадаю кожнай камандзе ўдачы, згуртаванасці і поспехаў у праходжанні выпрабаванняў, – адзначыў Дзмітрый Расціслававіч.

Рэгламент і ўмовы конкурсу, парадак праходжання этапаў спаборніцтваў удзельнікам патлумачыў першы намеснік начальніка Дзятлаўскага РАНС Уладзімір Бялятка. Жараб’ёўка вызначыла парадак выступлення, і ўдзельнікі адправіліся на старт.

Санітарныя дружыны ў гэтым годзе працавалі комплексна: напачатку – праверка ўкамплектаванасці медыцынскіх сумак і аснашчэння, дзе павінна быць усё неабходнае для выратавання жыцця чалавека.

У ачагу камбінаваных паражэнняў улічвалася экіпіраванасць і надзейнасць тэарэтычных ведаў канкурсантак, даводзілася прымяняць і практычныя навыкі. Упершыню ў конкурсе выкарыстоўвалася машына “хуткай” дапамогі: кожная каманда прадэманстравала транспарціроўку

пацярпелага да яе на насілках або шчыце.

Таксама каманды паказвалі веды, працавалі пад кантролем спецыялістаў у змадэляваных ачагах хімічнага і інфекцыйнага паражэння.

Усіх удзельнікаў спаборніцтваў забяспечвала вадой  раённая арганізацыя Таварыства Чырвонага Крыжа.

У спаборніцтвы пажарных фарміраванняў традыцыйна ўвайшлі баявое разгортванне ад мотапомпы, пераадоленне стометровай паласы перашкодаў і пажарная эстафета. На гэтых этапах самадзейным пажарным спатрэбіліся хуткасць, спрыт, камандны дух і, вядома, веданне правілаў пажарнай бяспекі і алгарытму выратавання пацярпелых.

Сярод пажарных падраздзяленняў арганізацый раёна лепшымі ў эстафеце былі ўдзельнікі пажарнай дружыны ААТ “Дварэц-Агра”, яны ж сталі лепшымі ў пажарнай эстафеце. У баявым разгортванні ад мотапомпы найлепш паказалі сябе дружыннікі КСУП “Войневічы”. Найлепшы персанальны вынік у пажарнай эстафеце паказаў Аляксей Сачык (ААТ “Дварэц-Агра”), на другім і трэцім месцы адпаведна Святаслаў Ісачэнка і Дзмітрый Сямашка (ААТ “Дварэцкі льнозавод”).

Па выніках усіх этапаў пераможцай стала пажарная дружына ААТ “Дварэц-Агра”, на другім месцы – каманда ААТ “Дварэцкі льнозавод”, на трэцім – КСУП “Войневічы”. Пераможцы адзначаны граматамі раённага выканаўчага камітэта і грашовымі прэміямі ад Дзятлаўскага добраахвотнага пажарнага таварыства. Раённыя ўзнагароды камандам уручыў Дзмітрый Баравік, суцяшальны прыз – старшыня раённай арганізацыі Таварыства Чырвонага Крыжа Галіна Касцюк.

Лідарства ў спаборніцтвах санітарных дружын пацвердзіла каманда КСУП “Войневічы”, якую рыхтавала фельчар Войневіцкага ФАПа Іна Рукан; віцэ-чэмпіёнам стала каманда КСУП “Жукоўшчына” пры ўдзеле фельчара Жукоўшчынскага ФАПа Ларысы Кучынскай; бронзавым прызёрам – “КСУП “Хвінявічы”, трэнер – фельчар Парэцкай амбулаторыі Тэрэза Плошчанка.

Уладальнікі прызавых месцаў атрымалі дыпломы і грашовыя прэміі, былі адзначаны прызамі за работу на этапах.

Пераможцы сярод санітарных і пажарных дружын Дзятлаўшчыны прадставяць наш раён на абласных спаборніцтвах напрыканцы чэрвеня.

Наталля АВЯРЧУК