У Жукоўшчынскім сельвыканкаме адбылося чарговае пасяджэнне грамадскага пункта аховы правапарадку

У цэнтры ўвагі былі асобы, якія злоўжываюць спіртнымі напоямі.

– Наша задача – прафілактыка: не пакараць, а разам з чалавекам знайсці шляхі выйсця з сітуацыі, – адзначыў старшыня сельвыканкама Валерый Верамейчык.

Праблемы з алкаголем не маюць перавагаў па ўзросце, узроўні інтэлекту і палавой прыналежнасці. Пасяджэнне камісіі наведалі і жанчына, якая праз заганную звычку не можа ўладкавацца на сталую працу і падтрымліваць парадак ва ўласным доме; і філосаф па жыцці, якога “зялёны змей” падштурхоўвае псаваць жыццё любімай жонцы; і малады чалавек, што “любіць пагуляць”; і пенсіянер, для якога алкагольнае ап’яненне разам з марозным надвор’ем ледзь не каштавала жыцця. Многія з жыхароў сельсавета ў пункце аховы правапарадку не першы і нават не другі раз. Камісія спрабуе вырашыць праблему кожнага на месцы: вусным папярэджаннем і верай у абяцанне выправіцца і працаўладкавацца, рэкамендацыяй запісацца на прыём да доктара-нарколага, як правіла, з далейшым накіраваннем на добраахвотнае або прымусовае лячэнне. Ніводзін з тых, хто не пажадаў сам наведаць пасяджэнне пункта ў азначаны дзень, не застанецца без увагі членаў камісіі.

Адначасова з мерапрыемствам у фае Жукоўшчынскага сельвыканкама ратаўнікі ладзілі акцыю “Бяспека ў кожны дом”. Старшы інспектар Дзятлаўскага РАНС Марта Мілаш разам з наведвальнікамі пасяджэння ўзгадала асноўныя прычыны пажараў, падмацоўваючы словы фотафактамі рэальных надзвычайных сітуацый. У час гульні “Сакрэт бяспекі” прысутныя паўтарылі правілы пажарнай бяспекі дома і атрымалі ў якасці прыза друкаваныя памяткі.

Наталля АВЯРЧУК