У новым годзе – павышэння надояў і прывагаў

Віншаванні з надыходзячымі навагоднікі святамі прымалі работнікі адкрытага акцыянернага таварыства “Граніт-Агра”.

На Дзятлаўшчыне прадаўжаюцца мерапрыемствы рэспубліканскай акцыі “Наш жывёлавод”, ініцыяванай Беларускім прафсаюзам работнікаў АПК і Міністэрствам сельскай гаспадаркі і харчавання. 

Гэта добрая магчымасць выказаць словы ўдзячнасці жывёлаводам за іх напружаную і патрэбную працу.

З падарункамі і сюрпрызамі калектывы МТК “Еленка”, “Касцюкі”, “Таркачы”, “Белагурна” наведалі першы намеснік старшыні райвыканкама – начальнік упраўлення сельскай гаспадаркі і харчавання Віталій Шулейка, старшыня раённай арганізацыі Беларускага прафсаюза работнікаў аграпрамысловага комплексу Уладзімір Казак, да якіх далучыліся дырэктар ААТ “Граніт-Агра” Уладзімір Лашко і Дзед Мароз са Снягурачкай – работнікі прадпрыемства Дзіяна Крамянеўская і Кірыл Буча.

– У жывёлагадоўлі не бывае перапынку, тут кожны дзень напоўнены напружанай працай, якая патрабуе фізічных затрат і ўвагі. Таму шчыра хочацца падзякаваць людзям, якія абралі для сябе такую ​​няпростую прафесію і паказваюць добрыя вынікі ў сваёй справе, – падкрэсліў Віталій Шулейка.

Ён пажадаў работнікам жывёлагадоўлі сельгасарганізацыі павышэння надояў і прывагаў, выдатнага настрою, моцнага здароўя, мірнага неба і ўручыў прыемны бонус да Новага года – грашовыя сертыфікаты ад прафсаюза АПК.

Са словамі ўдзячнасці да работнікаў гаспадаркі звярнуўся Уладзімір Казак:

 – Ушанаванне работнікаў жывёлагадоўчай галіны не толькі ў рамках гэтай акцыі надае людзям новы стымул для дасягнення больш высокіх вынікаў. Ваша работа не з лёгкіх і павінна быць у пашане гэтак жа, як і дзейнасць удзельнікаў іншых сельгасработ: сяўбы, жніва, корманарыхтоўкі. Таму для прафсаюзаў важна сустракацца з калектывам ферм і комплексаў, удзяляць асаблівую ўвагу пытанням бяспекі іх працы, санітарна-бытавым умовам, а таксама заахвочваць лепшых работнікаў галіны.

Ён падкрэсліў, што стварэнне бяспечных і камфортных умоваў працы, дапамога ў арганізацыі адпачынку, рэгуляванне аплаты працы – у ліку прыярытэтаў прафсаюзнай арганізацыі не толькі ў час акцыі, а пастаянна.

Прыемным сюрпрызам для работнікаў комплексаў сталі віншаванні і пачастункі ад Дзеда Мароза і Снягурачкі.

Акцыя “Наш жывёлавод” на Дзятлаўшчыне толькі набірае абароты. У новым 2026 годзе яе героямі стануць работнікі іншых сельгаспрадпрыемстваў раёна.

Наталля АВЯРЧУК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga

#нашелучшее #нашалепшае