Трыумф берагіняў традыцый: Дзятлаўшчына бліснула на фестывалі “Скарбы Гродзеншчыны”

У Год беларускай жанчыны асабліва прыемна адзначаць поспехі тых, хто сваім талентам, адданасцю і шчырай любоўю захоўвае духоўны код нашай зямлі. Менавіта такія вынікі прадэманстравалі творчыя калектывы Дзятлаўшчыны на абласным фестывалі “Скарбы Гродзеншчыны”, з гонарам прадставіўшы багацце мясцовай спадчыны і атрымаўшы заслужаныя ўзнагароды.Фестываль стаў сапраўднай пляцоўкай для дэманстрацыі жывой культурнай спадчыны рэгіёна, і дзятлаўчане паказалі сябе з самага лепшага боку. Асаблівай увагі журы і гледачоў удастоілася творчая дэлегацыя нашага раёна ў намінацыі “За дзейсную папулярызацыю абрадавых і святочных традыцый Гродзенскага Панямоння”. 

Народны тэатр-студыя гульні “Суседзі” (кіраўнік Людміла Баклушына) прадставіў каларытны і душэўны эпізод “Вясельная брама” ў рамках унікальнага абласнога праекта “Вяселле па беларускіх канонах”. Гэтае яркае ўвасабленне старажытных звычаяў, поўнае сімволікі і мудрасці продкаў, не пакінула абыякавым нікога. Вынікам стала высокае прызнанне: калектыў быў адзначаны дыпломам і спецыяльным прызам. За гэтым поспехам стаіць нястомная праца жанчын, якія дасканала ведаюць, пяшчотна аднаўляюць і перадаюць наступным пакаленням сакральныя традыцыі нашых продкаў.

Сапраўдным скарбам фестывалю стала выступленне народнага фальклорнага калектыву вёскі Погіры Гезгалаўскага дома культуры. Пад кіраўніцтвам таленавітай Тамары Ступак – сапраўднай берагіні народнай культуры і яркага прыкладу жанчыны, цалкам адданай сваёй справе, – артысты пакаралі сэрцы ўсіх прысутных аўтэнтычным гучаннем, энергетыкай і шчырасцю. Вынік заканамерны і вельмі ганаровы: калектыў атрымаў дыплом I ступені і каштоўны падарунак у прэстыжнай намінацыі “Лепшы дарослы фальклорны калектыў”.

Гэтыя ўзнагароды – не проста адзнака майстэрства, а сімвал таго, што менавіта жанчыны часта з’яўляюцца галоўным стрыжнем, на якім трымаецца народная памяць. Яны сваімі рукамі вышываюць рушнікі, галасамі ажыўляюць старыя песні і любоўю захоўваюць душу роднага краю.

Віншуем нашых землякоў, і асабліва ўдзельніц калектываў, з гэтымі высокімі дасягненнямі! Ваш талент, энтузіязм і любоў да роднай зямлі робяць Дзятлаўшчыну сапраўды ўнікальным і непаўторным куточкам Гродзеншчыны. Няхай натхненне ніколі не пакідае вас, а скарбы нашай спадчыны працягваюць жыць і квітнець дзякуючы вашым нястомным старанням!

Гастрафэст “Бульбашок”: смак сапраўдных традыцый ад Дзятлаўшчыны

Акрамя абласнога фестывалю традыцыйнай культуры “Скарбы Гродзеншчыны”, на Аўгустоўскім канале разгарнуўся сапраўдны гастранамічны рай са стравамі беларускай кухні. Гастрафэст “Бульбашок” прапанаваў пачастункі з цёртай бульбы. Гэта была самая духмяная пляцоўка свята. Тут прадстаўнікі розных раёнаў паказвалі свае любімыя і традыцыйныя рэцэпты, прадставіла сваю спадчыну і Дзятлаўшчына.

Носьбіты традыцый прыгатавання дранікаў Таццяна Палуносік і Ганна Харлінская прэзентавалі сапраўдныя шэдэўры з таркаванай бульбы. Жанчыны дзяліліся з гасцямі не толькі гатовымі стравамі, але і галоўнымі сакрэтамі іх прыгатавання.

Як расказалі майстрыхі, сапраўдныя дзятлаўскія дранікі патрабуюць асаблівай увагі да дэталяў: бульбу трэба церці непасрэдна перад смажаннем, абавязкова дадаваць крыху цыбулі, каб маса не цямнела, і клапатліва смажыць на добра разагрэтай патэльні да ўтварэння залацістай скарыначкі.

Пах свежасмажанай бульбы, дамашняй смятаны і зяленіва прыцягваў да пляцоўкі Дзятлаўшчыны сапраўдныя чэргі. Госці фестывалю не толькі ласаваліся, але і актыўна запісвалі рэцэпты, фатаграфаваліся з гаспадынямі і дзяліліся цёплымі ўражаннямі. “Гэта не проста ежа, гэта сапраўдны смак дзяцінства і нашых каранёў”, – адзначалі наведвальнікі, спрабуючы пачастункі.

Удзел Дзятлаўшчыны ў гастрафэсце “Бульбашок” чарговы раз пацвердзіў, што беларуская кухня – гэта не толькі сытная ежа, але і сапраўднае мастацтва. Такія падзеі на маляўнічым Аўгустоўскім канале дазваляюць адчуць бязмежную гасціннасць Гродзеншчыны, захаваць унікальныя кулінарныя традыцыі нашага краю, каб перадаць іх нашчадкам.

Марына ЛУКІЯНЕЦ,
загадчыца метадычнага аддзела Дзятлаўскагараённага цэнтра культуры і народнай творчасці

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga

#нашелучшее #нашалепшае #годбелорусскойженщины