Тлумачым, як падаваць электронныя звароты праз сайт “обращения.бел”

З 2023 года падача ў дзяржаўныя органы і арганізацыі электронных зваротаў і атрыманне адказаў (апавяшчэнняў) на іх ажыццяўляецца з дапамогай дзяржаўнай адзінай інфармацыйнай сістэмы ўліку і апрацоўкі зваротаў грамадзян і юрыдычных асоб “обращения.бел”. Па сутнасці, замест неабходнасці запаўнення спецыялізаванай формы на пэўным сайце дзяржаўнага органа ці іншай дзяржаўнай арганізацыі заяўніку прадастаўляецца адзіны інтэрфейс для афармлення электроннага звароту і яго падачы ў любую арганізацыю, падключаную да сістэмы ўліку і апрацоўкі зваротаў.

Падрабязней пра сайт “обращения.бел” і як ім карыстацца, расказала намеснік начальніка аддзела па юрыдычнай рабоце, зваротах грамадзян і юрыдычных асоб райвыканкама Марына Панкевіч:

– Перад падачай заяўніку неабходна аўтарызавацца ў сістэме. Для гэтага неабходна зайсці на сайт “обращения.бел”, запоўніць формы, прадстаўленыя ў рубрыцы “рэгістрацыя” (прозвішча, імя, імя па бацьку, паштовы і электронны адрасы, нумар мабільнага тэлефона, лагін і пароль). Пасля таго як сістэма зваротаў дашле на тэлефон праверачны код, паўторна пацвердзіўшы свой лагін і пароль, грамадзянін атрымлівае ў сістэме зваротаў электронны асабісты кабінет, праз які зможа накіроўваць звароты як з камп’ютара, так і з мабільнага тэлефона.

Працэдура ідэнтыфікацыі юрыдычных асоб прадугледжвае выкарыстанне толькі сертыфіката адкрытага ключа або ID-карты, якая належыць кіраўніку або асобе, упаўнаважанай падпісваць звароты. Пры незахаванні абавязковых патрабаванняў электронны зварот пакінуць без разгляду.

Пасля ўваходу ў сістэму зваротаў заяўнік зможа падаць электронны зварот. Яго тэкст павінен быць чытаемым, на беларускай або рускай мове, не ўтрымліваць нецэнзурных або абразлівых слоў ці выразаў. Сутнасць звароту нельга выкладаць у выглядзе спасылак на інтэрнэт-рэсурс. Калі электронны зварот падае прадстаўнік заяўніка, трэба прымацаваць дакумент у электронным выглядзе, які пацвярджае паўнамоцтвы. Пасля адпраўкі звароту сістэма дазваляе наладзіць атрыманне анлайн або смс-уведамлення аб тым, на якой стадыі разгляду яно знаходзіцца. Пры гэтым уся інфармацыя аб пададзеных электронных зваротах будзе даступная заяўніку ў яго асабістым кабінеце.

Адказы (апавяшчэнні) на электронныя звароты накіроўваюцца таксама праз сістэму зваротаў. Выключэнне зробяць, калі заяўнік у электронным звароце папросіць накіраваць пісьмовы адказ. Пры гэтым у сістэме можна наладзіць дадатковыя спосабы паведамлення аб выніках разгляду, напрыклад шляхам СМС або на электронную пошту.

Пры рабоце ў сістэме зваротаў грамадзянам трэба ўлічваць шэраг абставінаў і правілаў:

1. Сістэма зваротаў прызначана для падачы зваротаў, якія разглядаюцца ў адпаведнасці з Законам Рэспублікі Беларусь “Аб зваротах грамадзян і юрыдычных асоб”. Калі ваша пытанне падлягае разгляду ў рамках адміністрацыйнага працэсу, грамадзянскага, гаспадарча-працэсуальнага або крымінальна-працэсуальнага заканадаўства, заканадаўства аб адміністрацыйных працэдурах, звароту работніка да наймальніка, то адказы на гэтыя пытанні праз дадзеную сістэму накіроўвацца не будуць.

2. Нельга накіраваць праз сістэму зваротаў свае прэтэнзіі на адрас індывідуальных прадпрымальнікаў, паколькі на дадзеным сэрвісе акрэдытаваны толькі юрыдычныя асобы дзяржаўнай формы ўласнасці. Да індывідуальных прадпрымальнікаў варта звяртацца шляхам унясення заўваг або прапаноў у Кнігу заўваг і прапаноў.

3. Грамадзянін пры накіраванні звароту праз сістэму зваротаў выбірае са спісу тую арганізацыю, ад якой хоча атрымаць адказ. Калі зварот будзе накіраваны не па кампетэнцыі, то на працягу пяці рабочых дзён ён або вернецца з тлумачэннем аб тым, куды трэба звярнуцца, або адразу будзе перанакіраваны ў іншую інстанцыю з паведамленнем заяўніка праз асабісты кабінет. У дадзеным выпадку тэрмін разгляду звароту можа павялічыцца.

4. Калі, абыходзячы мясцовыя органы, грамадзянін звярнуўся ў вышэйшую інстанцыю (бывае, адначасова адразу ў некалькі абласных і рэспубліканскіх інстанцый) пры адсутнасці ў сістэме зваротаў інфармацыі аб разглядзе пытання на мясцовым узроўні, зварот будзе пераадрасаваны назад на мясцовы ўзровень. А абскардзіць адказ мясцовага органа на зварот можна і ў вышэйшую інстанцыю. Пры нязгодзе з рашэннем вышэйстаячай інстанцыі грамадзянін можа звярнуцца ў суд. Дадзеныя патрабаванні заканадаўства дазваляюць больш рацыянальна выкарыстоўваць дзяржаўныя рэсурсы пры разглядзе зваротаў, асабліва ў выпадках злоўжывання грамадзянамі сваім правам на звароты.

Ірына КАМАРОВА

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga