Талакой – за парадак на зямлі. Рэспубліканскі суботнік на Дзятлаўшчыне

20 красавіка па ўсёй Беларусі праходзіць рэспубліканскі суботнік.

Дзятлаўшчына таксама масава ўключылася ў мерапрыемствы па навядзенні парадку на зямлі, якія завяршаюць месячнік па санітарнай ачыстцы і ўборцы тэрыторый райцэнтра, гарадскіх пасёлкаў і сельскіх населеных пунктаў раёна.

Прадстаўнікі раённай улады, сілавых структур, грамадскіх арганізацый і аб’яднанняў, а таксама работнікі калектываў і школьнікі раёна наводзяць парадак на тэрыторыі сваіх установаў, у грамадскіх месцах, каля помнікаў і месцаў пахаванняў ахвяраў Вялікай Айчыннай вайны, на гарадскіх і мясцовых могілках.

Адным з маштабных аб’ектаў суботніка стаў гарадскі сквер па вуліцы Слонімскай, дзе навядзеннем парадку займаліся кіраўніцтва і супрацоўнікі райвыканкама, раённага Савета дэпутатаў, работнікі Дзятлаўскага лясгаса, ДРБУ-119, Дзятлаўскага РЭС раённай газэнергаінспекцыі, інспекцыі прыродных рэсурсаў і навакольнага асяроддзя.

Разам з калегамі працуе старшыня райвыканкама Андрэй Садоўскі.

– Традыцыя ладзіць суботнікі мае больш чым стогадовую гісторыю, калі Уладзімір Ленін нёс бервяно на майскім суботніку ў 1920 годзе. А ўсе добрыя традыцыі савецкага часу мы зберагаем  і  падтрымліваем. Відавочная карысць такіх мерапрыемстваў: добраўпарадкаванне, рамонт, прыбіранне тэрыторый – усё гэта мы робім для сябе і сваёй малой радзімы, – адзначыў кіраўнік раёна. – З другога боку, акумулююцца грашовыя сродкі, якія становяцца важным укладам у рэспубліканскія, абласныя і раённыя сацыяльныя, патрыятычныя праекты, як аднаўленне комплексаў “Брэсцкая крэпасць – герой” “Хатынь” і “Ала”. У межах суботніка мерапрыемствы па навядзенні парадку на Дзятлаўшчыне пачаліся з чацвярга, завяршаем іх разам з усёй краінай. Дзятлаўчан хвалююць пытанні добраўпарадкавання, гэта відаць па зваротах на прыём кіраўніцтва раёна. Калі чыста, паўсюль парадак, прыемна самім жыхарам раёна, тым больш, што кожны ўнёс у добрую справу пасільны ўклад.

Андрэй Уладзіміравіч адзначыў, што грашовыя сродкі, заробленыя на рэспубліканскім суботніку, часткова будуць пералічаны для рэалізацыі рэспубліканскіх праектаў – рэканструкцыю мемарыялаў і будаўніцтва патрыятычнага цэнтра. Доля фінансаў , прызначаная для раёна, будзе выдаткавана на патрэбы жыллёва-камунальнай службы, сацыяльнай  сферы і добраўпарадкаванне.

Дзятлаўчане актыўна ўключыліся ў актыўную добрую справу – рабіць наш родны край чыстым і прыгожым.

Вячаслаў Пятраш, інспектар раённай газэнергаінспекцыі:

– Парадак у парку наводзім кожны год, працуем разам з калегамі з раёна электрычных сетак. Надвор’е някепскае, нягледзячы на прагнозы, настрой пазітыўны. Прыемна папрацаваць на прыродзе і зрабіць чысцейшым родны горад.

Алена Бічэль, галоўны спецыяліст раённага Савета дэпутатаў:

– Беларусы – працавіты і дбайны народ, таму наводзіць парадак на сваёй зямлі – з’ява натуральная. Дома ўжо падрыхтаваліся да вялікіх хрысціянскіх святаў, усё прыбралі, цяпер час удзяліць увагу роднаму гораду. Працуецца весела, дружна, бо каманда вялікая. Думаю, задачу хутка выканаем.

Наталля АВЯРЧУК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga