Сустрэчы ў калектывах. Працай можна дабіцца многага

На Дзятлаўшчыне ў рамках электаральнай кампаніі прадаўжаюцца інфармацыйныя сустрэчы ў працоўных калектывах.

На гэты раз старшыня раённага Савета дэпутатаў Аляксандр Бараноўскі і першы намеснік старшыні райвыканкама – начальнік упраўлення сельскай гаспадаркі і харчавання Віталій Шулейка сустрэліся з работнікамі КСУП “Жукоўшчына” і дырэктарам гаспадаркі Васілём Алесюком.

Аляксандр Бараноўскі адзначыў, што 2024 год быў паспяховым для нашага раёна: у рэспубліканскім рэйтынгу мы ўвайшлі ў дзясятку лепшых раёнаў Беларусі. У год важнай для нашай Радзімы юбілейнай даты – 80-годдзя вызвалення Беларусі ад нямецка-фашысцкіх захопнікаў да Дня Перамогі савецкага народа ў Вялікай Айчыннай вайне горад Дзятлава па ўказе Прэзідэнта Аляксандра Лукашэнкі ў ліку яшчэ 8 населеных пунктаў рэспублікі адзначаны вымпелам “За мужнасць і стойкасць у гады Вялікай Айчыннай вайны”. Ганарымся і вынікамі ў сельскай гаспадарцы: упершыню ў раёне дасягнуты рэкордны валавы збор збожжавых культур з кукурузай у 111,2 тысячы тон.

Прадоўжыў тэму Віталій Шулейка:

– За мінулы год на Дзятлаўшчыне зроблена многае: рамантаваліся ФАПы і пабудаваны новы модульны ў вёсцы Ахонава, праведзена значная работа па комплексным добраўпарадкаванні населеных пунктаў, рамонце аб’ектаў сацыяльнай і культурнай сферы, капітальным рамонце жылфонду за кошт бюджэтных сродкаў. У жывёлагадоўлі забяспечаны рост вытворчасці малака на 113 працэнтаў, прадукцыі вырошчвання буйной рагатай жывёлы на 107,6 працэнта. Раён забяспечаны кармамі, надоі, напрыклад, у вашым КСУП “Жукоўшчына” склалі 7106 літраў на карову. Гэта далёка не ўсе дасягненні. Зразумела, як і ў любой дзяржаве ў Беларусі і нашым раёне ўзнікаюць пытанні, аднак мы ад іх не абстагуемся, а вырашаем. У нас сацыяльна арыентаваная краіна, гэтага курсу яна будзе прытрымлівацца надалей. Кожнаму важна памятаць, што поспехі і дабрабыт – вынікі працы людзей, і стараннай працай можна дабіцца многага, галоўнае, каб над галавой было мірнае неба.

Ірына СТЫРНІК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga

#Президент  #Выборы