З надыходам вясны вяртаюцца на радзіму пералётныя птушкі і ў ліку першых – шпакі. Як і многія іншыя, яны дапамагаюць зберагчы дрэвы ад шкоднікаў, таму наша задача – стварыць умовы для птушыных сяброў.
Раённая акцыя “Сустракаем пярнатых” – яскравы прыклад таму. Усе школьнікі Дзятлаўшчыны адгукнуліся на гэту прапанову і прынялі самы актыўны ўдзел.
Мы разумеем, што, дапамагаючы птушкам, робім добрую справу не толькі для прыроды, але і для сябе: зберагаем прыродныя багацці для многіх пакаленняў.
Развешваць шпакоўні – старадаўняя традыцыя, якая зарадзілася больш за тры стагоддзі таму. Але ці ўсе ведаюць, што існуюць вызначаныя правілы вырабу і размяшчэння птушыных хатак. Удзельнічаючы ў акцыі, мы з аднакласнікамі спачатку ўважліва іх вывучылі і вось што высветлілі: шпакоўні не рэкамендуецца развешваць паблізу гадавальнікаў плантацый, на якіх вырошчваюцца пладова-ягадныя культуры, каля ажыўленых трас. У высокашчыльных лясных насаджэннях неабходна размяшчаць іх на ўзлесках, палянах, высечках, прагалінах, уздоўж прасек і лясных дарог, а ў нізкашчыльных – раўнамерна па ўсім участку.
Акрамя таго, шпакі ніколі не паселяцца ў хатцы, якая дрэнна замацавана на дрэве, пафарбавана ў яркі колер або зроблена са свежых дошак, якія пахнуць смалой. І ніякіх шчылін! Інакш птушаняты загінуць у халоднае надвор’е. Дыяметр лятка – не большы за 5 см. Прысадныя палачкі не рабіце, бо яны толькі дапамагаюць варонам і катам выцягваць з гнязда птушанят. Вонкавыя сценкі выстругайце, а вось унутраныя пакіньце шурпатымі: так птушкам будзе лягчэй выбірацца наверх. Дах прадумайце так, каб яго можна было лёгка зняць, бо ў скарыстаных шпакоўнях пажадана прыбіраць старыя гнёзды. На дно насыпце трохі сухога торфу ці драўнянага пілавіння – лепш асінавага ці бярозавага.
У нашай школе экалагічная акцыя “Падорым дом птушкам разам” працягнецца да пачатку красавіка. Навучэнцы сумесна з бацькамі, членамі школьнага лясніцтва “ЛесКам+” зрабілі шпакоўні, сінічнікі для птушак. Домікі развесілі на тэрыторыі школы, а члены школьнага лясніцтва – на экалагічнай сцежцы Вензавецкага лясніцтва. Вынікі акцыі будуць падведзены на ўрачыстай лінейцы, прысвечанай пачатку наступнай чвэрці.
У нас ёсць новыя ідэі і задумкі, якія, упэўнены, будуць абавязкова ўвасоблены ў жыццё з удзелам нашых аднадумцаў: навучэнцаў і іх бацькоў, работнікаў школы.
Разам мы зробім шмат карысных спраў!
Ганна ЛАЎРЭНЦЬЕВА,
юны журналіст газеты “Перамога”, навучэнка 9 “Б” класа, член школьнага лясніцтва “ЛесКам+” сярэдняй школы № 1 г. Дзятлава імя А. М. Чурылы
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
#образование #школа
