Напярэдадні святкавання 80-годдзя Перамогі савецкага народа ў Вялікай Айчыннай вайне навучэнцы 9-х класаў сярэдняй школы № 1 горада Дзятлава імя А. М. Чурылы наведалі горад-герой Брэст: мемарыяльны комплекс “Брэсцкая крэпасць-герой” і музей “Выратаваныя мастацкія каштоўнасці”.
Экскурсія па гістарычным горадзе Брэсце пачалася ўжо з таго моманту, калі мы толькі заехалі на Маскоўскую шашу, бо па ўсёй яе даўжыні размешчана алея са стэламі з назвамі гарадоў-герояў рэспублік былога Савецкага Саюза.
Наведаўшы мемарыяльны комплекс “Брэсцкая крэпасць-герой”, мы ўбачылі знакамітую скульптуру “Смага”, Холмскія вароты, азнаёміліся з тэрыторыяй Цэнтральнага вострава – Цытадэлі, з экспазіцыямі музея “Вызваленне Брэсцкай крэпасці” – яшчэ раз перагарнулі гераічныя старонкі гісторыі з перыяду Першай сусветнай вайны па чэрвень-ліпень 1941 года. Разглядаючы экспанаты, фотаздымкі, мемарыяльныя пліты, прыгонныя збудаванні і руіны, якія засталіся пасля лютых баёў у час вызвалення Брэсцкай крэпасці, яшчэ раз пераканаліся ў тым, як гераічна змагаліся з ворагам людзі, выстаялі і цаной уласнага жыцця падарылі нам мірнае неба, цудоўнае дзяцінства, свабоду і незалежнасць.
Не менш захапляльным стала наведванне ўнікальнага музея “Выратаваныя мастацкія каштоўнасці”. Кожная экспазіцыя тут непаўторная. Мы даведаліся пра гісторыю, звязаную з гэтымі экспанатамі, пра тое, як яны рэстаўруюцца, захоўваюцца, а іконы аднаўляюцца і часам займаюць месцы ў храмах.
Мы, нашчадкі Вялікай Перамогі, хочам сказаць падрастаючаму пакаленню: вывучайце гісторыю нашай унікальнай Беларусі, знаёмцеся з яе гістарычным мінулым, будзьце заўсёды ўдзячнымі тым, хто выстаяў у гады Вялікай Айчыннай вайны і падарыў нам бясцэннае сёння.
Паліна БАМБІР,
юны журналіст газеты “Перамога”, навучэнка 9 “Б” класа сярэдняй школы № 1 г. Дзятлава імя А. М. Чурылы
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
#Дятловщина #образование
