Спроба пяра. “Музей у чамадане”, ці Як навучэнцы ажывілі гісторыю СССР

У гімназіі № 1 горада Дзятлава адбылося незвычайнае мерапрыемства –перасоўная выстава “Музей у чамадане”, якая аб’яднала вучняў 2-11 класаў у маштабным гісторыка-творчым праекце. 

Гімназісты ператварылі старыя вінтажныя чамаданы ў сапраўдныя “капсулы часу”, кожная з якіх стала тэматычнай міні-экспазіцыяй. Гэты фармат дазволіў не толькі кампактна і мабільна прадставіць артэфакты, але і сімвалічна перадаць сувязь пакаленняў – бо чамаданы часта захоўваюць памяць аб падарожжах, пераездах і сямейных гісторыях.

Юныя экскурсаводы падрыхтавалі разнастайныя праекты, сярод якіх вылучаліся:

“Дакументальная гісторыя” –  сапраўдныя савецкія пасведчанні, працоўныя кніжкі, камсамольскія білеты і ганаровыя граматы, якія расказвалі пра лёсы жыхароў Дзятлаўскага раёна;

“Навагодняя настальгія” – калекцыі ёлачных цацак 60-80-х гадоў, паштоўкі, карнавальныя маскі і іншыя атрыбуты святаў, якія выклікаюць цёплыя ўспаміны;

“Зроблена ў СССР” –  экспазіцыя прадметаў побыту: сервізы, шкляныя фігуркі, алюмініевыя лыжкі, шклянкі, ручныя міксеры і іншыя ўзоры савецкага дызайну і прамысловасці.

Ключавой асаблівасцю выставы сталі асабістыя гісторыі, якія школьнікі збіралі разам з бацькамі, бабулямі і дзядулямі. Навучэнцы не проста паказвалі экспанаты, а дзяліліся сямейнымі ўспамінамі, звязанымі з імі.

Выстава “Музей у чамадане” стала яскравым прыкладам таго, як творчасць, даследаванне і эмацыйная ўцягнутасць могуць ператварыць вывучэнне гісторыі ў займальнае падарожжа і ўмацаваць сувязь паміж пакаленнямі.

Лізавета ЮРГЕЛЬ,
навучэнка 10 класа, удзельніца прэс-цэнтра гімназіі № 1 г. Дзятлава “Лічбавае медыя+”

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga