Скрозь гады – для новых пакаленняў

У рамках раённага мерапрыемства па ўшанаванні памяці воінаў-інтэрнацыяналістаў 15 лютага ў Новаяльнянскай сярэдняй школе было арганізавана тэматычнае пасяджэнне круглага стала з удзелам прадстаўнікоў раённай улады і воінаў-афганцаў, якое прадоўжыў традыцыйны маршрут памяці.

Сустрэча пачалася на школьным двары каля мемарыяльнай дошкі былому выпускніку ўстановы Аляксандру Шылаву, які загінуў, выконваючы свой інтэрнацыянальны абавязак у Афганістане. Імя яго носіць школьная піянерская дружына. Памяць воіна-афганца ўшанавалі і ўсклалі кветкі госці і ўдзячныя землякі.

Юныя экскурсаводы і кіраўнік народнага музея “Дзеці ліхалецця” Новаяльнянскай сярэдняй школы Тамара Крывеня пазнаёмілі ўдзельнікаў мерапрыемства з экспазіцыяй “Вялікі подзвіг не забыты”, якая раскрывае афганскую тэму, расказвае пра службу, вайсковыя будні, подзвігі і ўзнагароды воінаў-афганцаў, у тым ліку нашых землякоў. На працягу гэтага года яна будзе дапоўнена і пашырана да 35-годдзя вываду войскаў і 45-годдзя пачатку Афганскай вайны, якія будуць адзначацца ў 2024 годзе. Тамара Уладзіміраўна расказала таксама пра новую выставу музея да Года міру і стварэння.

У час пасяджэння круглага стала навучэнцы нагадалі гасцям, што вайна ў далёкай Дэмакратычнай Рэспубліцы Афганістан закранула і іх родную Наваельню – там служылі 14 жыхароў гарпасёлка, сярод якіх 10 былі выпускнікамі Новаяльнянскай сярэдняй школы.

– 15 лютага – дзень вываду савецкіх войскаў з Афганістана – свята для ўсіх нас, нягледзячы на яго трагізм. Колькі матуляў і бацькоў уздыхнулі свабодна, што скончылася тая вайна, – звярнуўся да прысутных старшыня райвыканкама Андрэй Садоўскі. – Сёлетняе раённае мерапрыемства праводзім у больш шырокім фармаце, каб перадаць воінам-інтэрнацыяналістам сімвалічную эстафету памяці. Яе ад ветэранаў Вялікай Айчыннай вайны прымаць менавіта ім.

Гісторыя жыве, пакуль мы памятаем пра загінулых і ваенныя падзеі, пакуль удзячны за мірнае неба над галавой.

Андрэй Садоўскі ўручыў Ганаровую грамату райвыканкама старшыні раённай арганізацыі ГА “Беларускі саюз ветэранаў вайны ў Афганістане” Алегу Драгунскаму, падзячныя лісты старшыні райвыканкама за актыўную грамадска-палітычную дзейнасць, патрыятычнае выхаванне моладзі і ў сувязі са 105-й гадавінай стварэння Узброеных Сіл Рэспублікі Беларусь Сяргею Грэцкаму, Сяргею Радомскаму, Маргарыце Жылінскай, Аляксандру Альшэўскаму.

Старшыня раённага Савета дэпутатаў Аляксандр Бараноўскі ўзгадаў гады сваёй тэрміновай службы ў Забайкальскай ваеннай акрузе, горадзе Чыце, у 1980-1982 гадах, калі ўсёй ротай яны пісалі просьбу камандаванню накіраваць іх у Афганістан. Лёс склаўся інакш. Аляксандр Станіслававіч пажадаў усім прысутным ніколі не сустрэцца з вайной, жыць у міры і дабрабыце. Ён уручыў Падзячныя лісты воінам-афганцам Васілію Масляку, Аляксею Бальшому, Валянціну Пачабыту, Дзмітрыю Талкуну.

– Вы тыя людзі, якія прайшлі дарогамі вайны, і каму, як не вам, з’яўляцца дастойным прыкладам для падрастаючага пакалення, – звярнуўся да воінаў-інтэрнацыяналістаў ваенны камісар Дзятлаўскага раёна Генадзь Суравец. Па рашэнні прэзідыума савета ГА “Беларускі саюз ветэранаў вайны ў Афганістане” ён уручыў медаль “За заслугі” І ступені Аляксандру Юргелю.

Удзельнікі круглага стала з дапамогай відэароліка акунуліся ў той шчаслівы дзень 15 лютага 1989 года, калі абмежаваны кантынгент савецкіх войскаў быў выведзены з Афганістана на тэрыторыю Савецкага Саюза, прагарталі іншыя старонкі гісторыі, звязаныя з памятнымі падзеямі. Песенныя віншаванні са святам гасцям адрасавалі навучэнцы.

Алег Драгунскі ад імя раённай арганізацыі ГА “Беларускі саюз ветэранаў вайны ў Афганістане” падзякаваў кіраўніцтву раёна за пашану і павагу да воінаў-інтэрнацыяналістаў, адміністрацыі Новаяльнянскай сярэдняй школы – за змястоўнае мерапрыемства і цёплы прыём, а таксама перадаў школьнаму музею кнігу аб Афганістане “Там, за ракой”.

У фае школы для гасцей выдалася магчымасць паразмаўляць і пафатаграфавацца з дзецьмі і педагогамі.

Наступным прыпынкам сталі новаяльнянскія могілкі, дзе ваенны камісар Дзятлаўскага раёна Генадзь Суравец і воіны-інтэрнацыяналісты ўшанавалі памяць і ўсклалі кветкі да магілы загінулага Аляксандра Шылава і воінаў-афганцаў, якія пайшлі з жыцця ўжо на Радзіме.

Наступнай госці наведалі ўрачыстую лінейку ў Дварэцкай сярэдняй школе, аддалі даніну памяці каля мемарыяльнай дошкі загінуламу земляку Дзмітрыю Лазовіку. На могілках аграгарадка малебен аб ім і іншых памерлых воінах-афганцах адслужыў іерэй Сергій Антошкаў – настаяцель царквы Пакрова Прасвятой Багародзіцы, былі ўскладзены вянкі і кветкі.

Ірына СТЫРНІК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga