Са святам, лесаводы Дзятлаўшчыны!

Напярэдадні Дня работнікаў лесу ва ўтульнай зале дзіцячай школы мастацтваў адбылася ўрачыстасць, прысвечаная людзям, чыёй прафесіяй з’яўляецца клопат аб лясным багацці раёна.

Павіншаваць іх прыйшлі прадстаўнікі кіраўніцтва раёна, адміністрацыя і прафсаюз Дзятлаўскага лясгаса.

Са словамі прывітання да сваіх калег звярнуўся намеснік дырэктара, галоўны інжынер Дзятлаўскага лясгаса Сяргей Дасько.

– Лес – гэта не проста галоўнае багацце нашай краіны, а складаная жывая сістэма. І я ганаруся тым, што наш калектыў працуе як адзіны зладжаны і моцны арганізм. Дзякуючы вашаму прафесіяналізму, цярпенню і адданасці справе, мы паспяхова пераадольваем самыя складаныя задачы, захоўваем баланс і ўпэўнена рухаемся наперад, нягледзячы на любыя эканамічныя ветравалы. У гэты святочны дзень хачу пажадаць вам стабільнага росту і працвітання ва ўсіх напрамках нашай дзейнасці, моцнага здароўя, невычэрпнай энергіі і аптымізму, надзейнага тылу ў асобе вашых блізкіх, цяпла і ўтульнасці ў дамах, упэўненасці ў заўтрашнім дні і новых прафесійных дасягненняў. Няхай усе нашы праекты пускаюць разгалістыя карані, а вынікі працы прыносяць заслужаны гонар і дастойны даход. Дзякуй за вашу высакародную працу, вялікую самааддачу і вернасць агульнай справе.

Сяргей Аляксандравіч уручыў абласныя і рэспубліканскія ўзнагароды работнікам Дзятлаўскага лясгаса. Падзяка міністра лясной гаспадаркі была аб’яўлена вальшчыку лесу Ігару Краснякову, падзяка генеральнага дырэктара Гродзенскага дзяржаўнага лесагаспадарчага аб’яднання – трактарысту па падрыхтоўцы лесасек, тралёўцы і вывазе лесу Мікалаю Касачу, навальшчыку-звальшчыку лесаматэрыялаў Ігару Герасіменку, бухгалтару Марыі Стракоўскай. Нагрудным знакам “10 гадоў бездакорнай службы ў дзяржаўнай лясной ахове Рэспублікі Беларусь” былі ўзнагароджаны інжынер па лесакарыстанні Анастасія Ермаковіч і ляснічы Гезгалаўскага лясніцтва Віктар Семянюк.

Ад імя кіраўніцтва раёна работнікаў лясной галіны павіншавала намеснік старшыні райвыканкама Вольга Жэлезоўская:

– Віншую вас з надыходзячым прафесійным святам і шчыра дзякую за вашу працу. Вы робіце тое, што не дадзена многім – сахоўваеце важную каштоўнасць і багацце нашай краіны, экалогію, будучыню для нашых дзяцей і наступных пакаленняў беларусаў. Жадаю вам добрага надвор’я, спрыяльнага клімату ў калектыве, падтрымкі дома. Вашаму прадпрыемству жадаю фінансавага дабрабыту і пастаяннага росту вытворчых паказчыкаў.   

Вольга Антонаўна ўручыла раённыя ўзнагароды: Ганаровую грамату Дзятлаўскага райвыканкама – галоўнаму бухгалтару Вользе Раманавай, станочніку дрэваапрацоўчых станкоў Сяргею Бойку, падзячны ліст старшыні Дзятлаўскага райвыканкама – дыспетчару Таццяне Заец, вадзіцелю пагрузчыка Раману Апанасіку. 

Таксама яна перадала словы ўдзячнасці лесаводам раёна ад дэлегацыі Казахстана, якая наведвала Дзятлаўшчыну ў межах вывучэння турыстычнага патэнцыялу. Госці былі ў захапленні ад беларускіх лясоў.

Плённая праца лесаводаў была таксама адзначана ўзнагародамі Дзятлаўскага лясгаса.

Стваралі добры настрой і дарылі ўдзельнікам мерапрыемства незабыўныя эмоцыі педагогі і навучэнцы дзіцячай школы мастацтваў.

Наталля АВЯРЧУК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga

#нашелучшее #нашалепшае