У рэспубліканскага штаба студэнцкіх атрадаў — час самай актыўнай падрыхтоўкі да трэцяга працоўнага семестра.
Так, 12 красавіка ў рамках рэспубліканскай акцыі “Выбіраем студатрад”, якая сёлета праходзіць пад слоганам “Труд — крут”, рэспубліканскі штаб студатрадаў правёў адзіны дзень адчыненых дзвярэй. Моладзі расказалі аб магчымасцях працаўладкавання ў перыяд трэцяга працоўнага семестра.
У гэты дзень штабы працоўных справаў пярвічных арганізацый ГА “БРСМ” установаў вышэйшай, сярэдняй спецыяльнай і прафесійна-тэхнічнай адукацыі ладзілі выставы, папулярызавалі студатрадаўскі рух саюзнай моладзі. Рэкламныя кампаніі суправаджаліся прэзентацыямі і творчымі выступленнямі байцоў студэнцкіх атрадаў.
Кожны, хто збіраецца папрацаваць гэтым летам і прыняць удзел у студатрадаўскім руху, меў магчымасць запоўніць анкету для працы ў атрадах. Анкетныя лісты ўлічваюць перавагі па профілі (студэнцкі будаўнічы, сельскагаспадарчы, педагагічны, сэрвісны, медыцынскі, экалагічны, вытворчы атрад), аб’екты, віды работ, памер заработнай платы.
Па садзейнічанне ў працаўладкаванні можна таксама звяртацца і на “гарачыя лініі”, якія створаны пры тэрытарыяльных камітэтах ГА “БРСМ” для аказання дапамогі ў працаўладкаванні маладым людзям, якія апынуліся ў складанай жыццёвай сітуацыі. Тэлефон “гарачай лініі” ў Гродне: 8 (0152) 77-02-50.
Час падаваць заяўкі
Дзятлаўскі раённы камітэт грамадскага аб’яднання “Беларускі рэспубліканскі саюз моладзі” прапануе старшакласнікам і студэнтам, якія жадаюць папоўніць свой бюджэт і атрымаць практычныя навыкі ў рабоце, падаваць заяўкі на летнюю працу. Лета — не за гарамі, прыспеў час задумацца, як правесці яго карысна.
На Дзятлаўшчыне фарміраванне раённай базы даных жадаючых працаўладкавацца і вакансій для моладзі будзе адбывацца за кошт інфармавання навучэнцаў старэйшых класаў школ раёна аб магчымасці працаўладкавацца на час летніх канікулаў. Аналіз атрыманых даных дапаможа каардынаваць запыты на працаўладкаванне, якія паступілі, і вакансіі, прапанаваныя наймальнікамі.
Па папярэдніх даных летам 2017 года на Дзятлаўшчыне будуць працаваць сэрвісны, сельскагаспадарчыя, экалагічны і, магчыма, педагагічны моладзевыя атрады. Аб дадатковых магчымасцях працаўладкавання і вакансіях будзем паведамляць пры паступленні такой інфармацыі.
Заяўкі на працаўладкаванне можна падаваць у Дзятлаўскі раённы камітэт ГА “БРСМ”. Дасылаць іх можна на электронныя адрасы: drk-888@rambler.ru, brsm@dyatlovo.gov.by. Тэлефоны для даведак: 2-52-63, 2-52-61.
Працавалі маладыя беларусы
У трэцім працоўным семестры 2016 года ў складзе студэнцкіх атрадаў было працаўладкавана больш за 70,3 тысячы чалавек, 1906 — індывідуальна. Беларускія студэнцкія атрады працавалі на аб’ектах будаўніцтва: Беларускай атамнай электрастанцыі (усебеларуская моладзевая будоўля), трэцяй лініі Мінскага метрапалітэна, Кітайска-Беларускага індустрыяльнага парка “Вялікі камень”, калектарнай станцыі ў пасёлку Бараўляны, а таксама на рэканструкцыі і будаўніцтве дарог, школ, дзіцячых садоў, спартыўных комплексаў, жылых дамоў па ўсёй краіне.
Байцы студатрадаў збіралі ўраджай, выхоўвалі дзяцей у дзіцячых аздараўленчых летніках, добраўпарадкоўвалі тэрыторыі ля помнікаў воінскай славы, месцы масавых пахаванняў, тэрыторыі населеных пунктаў, месцаў масавага адпачынку, водаахоўных зонаў, прыбярэжных палосаў водных аб’ектаў, паркаў, аб’ектаў культурна-гістарычнай і духоўнай спадчыны.
К. ХІЛІМОНЧЫК,
першы сакратар раённага камітэта ГА “БРСМ”
