Работнікам сферы культуры прадставілі новага кіраўніка

15 мая на пасаду загадчыцы сектара культуры райвыканкама заступіла Таццяна Ваніслаўчык.

Старшыня Дзятлаўскага раённага выканаўчага камітэта Андрэй Садоўскі павіншаваў Таццяну Пятроўну з назначэннем і прадставіў новага кіраўніка работнікам сферы культуры.

– Больш за 30 гадоў вы адпрацавалі па спецыяльнасці на розных участках у раёне, – зазначыў Андрэй Уладзіміравіч. – Працавалі паспяхова, добрымі вынікамі і дасягненнямі запомніліся на папярэднім месцы работы. Упэўнены, што справіцеся з новымі задачамі, і сфера культуры пад вашым кіраўніцтвам будзе развівацца, дасягаць новых вышыняў. Калектыў у вас згуртаваны, надзейны. Безумоўна, ёсць пэўныя цяжкасці, аднак яны вырашальныя. Работы вельмі шмат, участкі адказныя і іх нямала, як і мерапрыемстваў. Веру, што ў вас усё атрымаецца, жадаю невычэрпнай энергіі і поспехаў, у добры шлях!

Да віншаванняў далучыўся старшыня раённага Савета дэпутатаў Аляксандр Бараноўскі:

– Спадзяюся на цеснае супрацоўніцтва з вамі яшчэ і як партыйны лідар раённага аддзялення Гродзенскай вобласці Беларускай партыі “Белая Русь”. Дабрабыту вам, плёну ў рабоце. Добра ведаю вас як творчую і актыўную натуру, думаю, сфера культуры пад вашым кіраўніцтвам будзе паспяхова развівацца. Удачы вам!

– Паважаныя Андрэй Уладзіміравіч, Аляксандр Станіслававіч, калегі, – шчыра дзякую за цёплы прыём, за тое, што прадаставілі мне новыя магчымасці, аказалі давер, – падзякавала Таццяна Ваніслаўчык. – У сваю чаргу абяцаю, што прыкладу максімум намаганняў для вырашэння задач, якія стаяць перад сферай культуры, максімальна выкарыстоўваючы патэнцыял і развіваючы лепшыя традыцыі, якія закладзены і ёсць у культурным і творчым жыцці раёна. Яшчэ раз дзякую за давер.

Таццяна Ваніслаўчык нарадзілася 1 лістапада 1976 года ў вёсцы Лудзічы. У 1996 годзе скончыла Лідскае музычнае вучылішча і вярнулася ў родны раён працаваць настаўніцай музыкі ў тагачаснай сярэдняй школе № 2 горада Дзятлава (цяпер гімназія № 1). Нядоўгі час была музычным кіраўніком Дзятлаўскай дзяржаўнай школы-інтэрната для дзяцей-сірот і дзяцей, якія засталіся без апекі бацькоў. З 2003 года працавала ў гімназіі № 1 горада Дзятлава класным выхавальнікам, намеснікам дырэктара па выхаваўчай рабоце. У 2008-м скончыла завочнае аддзяленне Беларускага дзяржаўнага педагагічнага ўніверсітэта імя М. Танка па спецыяльнасці “сусветная і айчынная культура, фальклор”. У 2012-м узначаліла Цэнтр творчасці дзяцей і моладзі горада Дзятлава. З 2014 па 2016 гады была галоўным спецыялістам аддзела адукацыі райвыканкама. У 2016-м вярнулася на месца кіраўніка ў Цэнтр творчасці, прадоўжыла працаваць на гэтай жа пасадзе пасля рэарганізацыі ўстановы ў Дзятлаўскі раённы цэнтр дадатковай адукацыі дзяцей і моладзі.

Ірына СТЫРНІК       

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga

#нашелучшее #нашалепшае