Прыміце віншаванні і ўдзячнасць, работнікі спажывецкай кааперацыі!

У раённым Цэнтры культуры і народнай творчасці адбыўся канцэрт-віншаванне, прымеркаваны да Дня кааперацыі.

У святочнай зале сабраліся віноўнікі ўрачыстасці – работнікі Дзятлаўскага філіяла Гродзенскага аблспажыўтаварыства, у які сёння ўваходзяць Дзятлаўскі, Карэліцкі і Навагрудскі ўчасткі, і госці – прадстаўнікі кіраўніцтва раёна, старшыня Карэліцкага райвыканкама Аляксандр Курыла.

Са словамі віншавання да кааператараў звярнуўся дырэктар Дзятлаўскага філіяла Гродзенскага аблспажыўтаварыства Мікалай Гародка:

– Спажывецкая кааперацыя – неад’емная частка эканамічнага комплексу нашай краіны. Мы вядзём мадэрнізацыю вытворчасці, асвойваем выпуск новых відаў прадукцыі. Нашы намаганні накіраваны на вырашэнне задач па забеспячэнні якаснага абслугоўвання насельніцтва, асваенне лішкаў дзікарослай і сельскагаспадарчай прадукцыі, развіццё нарыхтоўчай, вытворчай і знешнеэканамічнай дзейнасці. Вынік залежыць ад работнікаў усіх узроўняў, якіх у нас працуе нямала. Хачу падзякаваць вам, дарагія калегі, за развіццё сваіх галінаў дзейнасці. Шаноўныя ветэраны спажывецкай кааперацыі! Мы з гонарам і павагай глядзім на вас. Вы – пацвярджэнне таго, што, толькі захоўваючы вялікую спадчыну, мы можам быць моцнымі. Ад імя дырэкцыі філіяла выказваю словы ўдзячнасці за нялёгкую працу ўсім работнікам галіны, якія з дня ў дзень сумленна выконваюць свае абавязкі. Сардэчна віншую вас з надыходзячым прафесійным святам! Жадаю      вам, вашым родным і блізкім моцнага здароўя, бадзёрасці і аптымізму, шчасця і дабрабыту, а таксама поспеху і працвітання спажывецкай кааперацыі.

Ад імя кіраўніцтва раёна з прафесійным святам землякоў павіншаваў старшыня раённага Савета дэпутатаў Аляксандр Бараноўскі:

– За шматгадовую гісторыю кааператыўная сістэма Беларусі не раз праходзіла праз выпрабаванні і даказала ўнікальную трываласць: выстаяла ў ваеннае ліхалецце, перажыла змену эканамічных эпох і сёння ва ўмовах жорсткай рыначнай барацьбы не проста ўтрымала пазіцыі, а змагла адкрыць для сябе новыя шляхі развіцця. Вы з’яўляецеся фундаментам, на якім трымаецца жыццё сельскіх жыхароў, дзякуючы вам нават у самых аддаленых куточках заўсёды будзе свежы хлеб і тавары першай неабходнасці. Сёння ў Дзятлаўскім філіяле на тэрыторыі нашага раёна дзейнічаюць 52 гандлёвыя аб’екты, з якіх 34 – стацыянарныя магазіны. Выязны гандаль вядуць 8 аўтамагазінаў, працуюць 9 аб’ектаў грамадскага харчавання. Пачынаючы з 2024 года, філіял прайшоў праз рэарганізацыю: да яго далучыліся Навагрудскі і Карэліцкі ўчасткі, што дазволіла ўмацаваць матэрыяльна-тэхнічную базу і значна пашырыць зону абслугоўвання. Словы шчырай удзячнасці выказваю ў адрас усяго вашага калектыву за вашу сумленную працу і добразычлівыя адносіны да людзей. Асаблівую падзяку адрасую ветэранам галіны, якія пачыналі працаваць у савецкі час, змаглі надаць гэтай прафесіі не проста навыкі, а асаблівую кааператарскую этыку – сумленнасць, узаемавыручку і ўменне радавацца агульнаму поспеху. Многія з вас і сёння ў страі, натхняеце моладзь сваім прыкладам і даказваеце вернасць выбранай справе. Упэўнены, што сучаснае пакаленне кааператараў дастойна прадоўжыць гэты шлях, памнажаючы дасягненні папярэднікаў. Ад усёй душы жадаю вам моцнага здароўя, невычэрпнай жыццёвай энергіі, сямейнага цяпла і дабрабыту. Няхай ваша работа прыносіць заслужаную павагу людзей і фінансавы дабрабыт.

Аляксандр Станіслававіч уручыў заслужаныя ўзнагароды: Ганаровай граматай Дзятлаўскага райвыканкама адзначаны прадавец Вольга Гародка, бухгалтар Таццяна Кашко, падзячным лістом старшыні Дзятлаўскага райвыканкама – цеставод Руслан Дзямідчык, вядучы юрысконсульт Аляксей Цітоў. Ганаровай граматай раённага Савета дэпутатаў узнагароджана повар Ганна Варган, падзячным лістом старшыні раённага Савета дэпутатаў – прыбіральшчыца памяшканняў Наталля Мілевіч, начальнік рознічна-гандлёвага ўчастка № 2 Іна Апанасевіч.

Да словаў віншавання далучыўся Аляксандр Курыла. Ён уручыў узнагароды Карэліцкага райвыканкама і Савета дэпутатаў работнікам спажывецкай кааперацыі Карэліччыны.

Кааператары Навагрудчыны таксама былі адзначаны раённымі ўзнагародамі, місію ўручыць іх, а таксама абласныя ўзнагароды выканаў Мікалай Гародка. У ліку іншых Ганаровай граматай Гродзенскага аблспажыўтаварыства адзначана прадавец Таццяна Бутэнка.  

Ветэраны спажывецкай кааперацыі атрымалі невялікія падарункі на памяць аб мерапрыемстве.

Для дзятлаўчан і гасцей нашага раёна гучалі музычныя падарункі ў выкананні  артыстаў і калектываў Дзятлаўшчыны.

Наталля АВЯРЧУК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga

#нашелучшее #нашалепшае