Прыгадаем адметныя падзеі 2016 года. Сакавік

Год культуры ўрачыста адкрыты

https://diatlovonews.by/2016/02/u-dzyatlave-adkryili-god-kulturyi/

 

На Дзятлаўшчыне ўрачыстае адкрыццё Года культуры прайшло ў Цэнтры культуры і народнай творчасці. Тут прысутнічалі прадстаўнікі розных накірункаў дзейнасці – артысты, майстры, бібліятэкары, музыканты.

У фае адбыліся выставы кніг, майстар-класы народных умельцаў, а на сцэне Цэнтра культуры выступілі лепшыя творчыя калектывы, сярод якіх Наваельнянскі духавы аркестр “Акцэнт”, народны ансамбль песні і музыкі “Ятранка”, народны хор “Ветэраны ў страі”, удзельнікі мясцовай цыркавой студыі, а таксама салісты і музыканты. Адкрыццё Года культуры ператварылася ў парад набыткаў за папярэднія гады.

Нам гады – не бяда!

Клуб пажылых людзей “Нам гады – не бяда!” адкрыўся ў Дзятлаве, у Цэнтры сацыяльнага абслугоўвання насельніцтва. Гэты клуб — месца, дзе пажылыя людзі могуць займацца творчасцю, асвойваць новыя ўменні, адчуваць сябе неадзінока.

Віцэ-чэмпіёны “Снежнага снайпера”

https://diatlovonews.by/2015/06/lyizharolernyiya-gonki/

 

Віцэ-чэмпіёнамі вярнуліся з рэспубліканскіх спаборніцтваў “Снежны снайпер” юныя біятланісты з Раготна Ангеліна Анушкевіч, Кірыл Якаўчык і Вольга Грыцук. Гэтыя выхаванцы трэнера Мікалая Анацкі ў складзе каманды Гродзенскай вобласці спаборнічалі на лыжаролерным стадыёне “Вяснянка”. Ангеліна Анушкевіч вызначылася і асабіста: заняла трэцяе месца па біятлоне (стральба і лыжная гонка).

У спартзалу – па здароўе

https://diatlovonews.by/2016/03/spartyiunyiya-strastsi-u-kazloushchyine/

 

У гарпасёлку Казлоўшчына адбылася спартакіяда “Здароўе”. У ёй прынялі ўдзел многія працоўныя калектывы. Прайшлі спаборніцтвы па валейболе, стральбе, дартсе, шашках, падыманні гіры, перацягванні каната. Пераможцай спартакіяды стала каманда прадпрыемства меліярацыйных сістэм. Ёй дастаўся пераходны кубак.

Пашпарт атрымліваюць у музеі

https://diatlovonews.by/2016/03/yunyiya-gramadzyane-respubliki-belarus/

На Дзятлаўшчыне стала традыцыяй уручаць пашпарты 14-гадовым юнакам і дзяўчатам – лепшым вучням, спартсменам, пераможцам алімпіяд і фестываляў – ва ўрачыстай абстаноўцы. Дзеля гэтага іх запрашаюць не ў міліцыю, а ў Дзятлаўскі гісторыка-краязнаўчы музей. Разам з дакументам маладыя грамадзяне Беларусі атрымалі кнігі-падарункі.

Поспех праз 25 гадоў

https://diatlovonews.by/2016/03/dzyatlauskiya-hakeistyi-peramozhtsyi-za/

 

Дзятлаўскія юныя хакеісты сталі пераможцамі абласнога турніру “Залатая шайба”. Дзятлаўчане абыгралі равеснікаў са Смаргоні, Шчучына, Астраўца, Карэлічаў. Такі поспех здарыўся праз 25 гадоў: толькі ў 1990-ым дзятлаўчане былі пераможцамі “Залатой шайбы”.

Чарнобыльскі шлях – праз Дзятлаўшчыну

https://diatlovonews.by/2016/03/charnobyilski-shlyah-daroga-zhyitstsya-pa-r/

 

Удзельнікі 30-й Міжнароднай сацыяльна-творчай праграмы “Чарнобыльскі шлях – дарога жыцця па роднай зямлі” не мінулі Дзятлаўшчыну. Жыхары Казлоўшчыны і Дзятлава атрымалі запрашэнне на канцэрт з удзелам кампазітараў Ігара Лучанка і Эдуарда Ханка, эстрадных выканаўцаў, заслужанага калектыву Беларусі “Церніца”.

Лідар года-2016

Адбыўся раённы этап рэспубліканскага агляду-конкурсу “Лідар года-2016” сярод школьнікаў. У фінальных спаборніцтвах удзельнічалі 8 прадстаўнікоў школ раёна. Пераможцай стала вучаніца першай дзятлаўскай школы Вікторыя Каракулька.

Прэс-тур журналістаў

https://diatlovonews.by/2016/03/pres-tur-dlya-zhurnalistau-voblastsi-pa/

 

Дзятлаўшчыну наведалі журналісты друкаваных і электронных сродкаў масавай інфармацыі Гродзеншчыны. Яны прынялі ўдзел у дабрачыннай акцыі, перадалі цацкі дзецям-інвалідам. Для гасцей была наладжана аглядавая экскурсія па Дзятлаве, наведванне санаторыяў “Радон” і “Альфа Радон”. Затым адбылася выязная прэс-канферэнцыя старшыні Гродзенскага аблвыканкама Уладзіміра Краўцова. На ёй прысутнічалі каля 40 прадстаўнікоў СМІ.

Юбілей мастака-кераміста

Споўнілася 85 гадоў Мікалаю Лаўрэнцьевічу Несцярэўскаму, мастаку-керамісту, сябру Беларускага саюза мастакоў. Яго маладосць прайшла на Дзятлаўшчыне. Тут ён пачынаў працаваць цесляром у арцелі, потым быў мастаком-афармляльнікам, метадыстам клубнай работы, настаўнікам малявання. Атрымаўшы адпаведную адукацыю, займеў творчую працу ў сталіцы. Ім аформлены інтэр’еры многіх адметных будынкаў, створаны керамічныя партрэты і скульптуры знакамітых людзей. Яго работы ёсць у многіх музеях і прыватных калекцыях.