Прэстыжна: прафесія следчага

Следчы камітэт уяўляе сабой адзіную самастойную ваенізаваную арганізацыю, падначаленую кіраўніку дзяржавы.

Супрацоўнікі Следчага камітэта з’яўляюцца прадстаўнікамі дзяржаўнай улады, знаходзяцца пад абаронай дзяржавы, маюць гарантыі і кампенсацыі.

Спецыялізацыю “судова-пракурорска-следчая дзейнасць” з кваліфікацыяй “юрыст”, якая непасрэдна звязана са следчай работай, можна атрымаць у Акадэміі Міністэрства ўнутраных спраў на самым “элітным” следча-экспертным факультэце. На час навучання курсанты акадэміі атрымліваюць поўнае дзяржаўнае забеспячэнне, бясплатную вышэйшую юрыдычную адукацыю, а па заканчэнні ім прысвойваецца спецыяльнае званне “лейтэнант юстыцыі”, гарантавана працаўладкаванне на пасады кіруючага саставу ў горадзе Гродне і Гродзенскай вобласці. Для супрацоўнікаў Следчага камітэта Рэспублікі Беларусь і членаў іх сем’яў заканадаўствам прадугледжаны сацыяльныя гарантыі. Курсанты Акадэміі МУС не падлягаюць прызыву ў армію.

Што неабходна для паступлення?

Да красавіка 2024 года трэба звярнуцца ў раённы аддзел Следчага камітэта Рэспублікі Беларусь па месцы жыхарства і там прайсці субяседаванне з начальнікам. Затым да сярэдзіны красавіка падаць у аддзел заяву аб паступленні для афармлення асабовай справы, а таксама прайсці медыцынскі агляд і псіхафізіялагічнае абследаванне ў ваенна-ўрачэбнай камісіі ва ўстаноўленым парадку і

падаць у аддзел дакументы, устаноўленыя парадкам прыёму ў Акадэмію МУС, копіі даведак сельскага выканаўчага камітэта ўстаноўленай формы і дакументаў, якія пацвярджаюць права абітурыента на льготы.

У тэрміны, вызначаныя Міністэрствам адукацыі Рэспублікі Беларусь, прайсці цэнтралізаванае тэсціраванне па прадметах:

руская (беларуская) мова; замежная мова; грамадазнаўства.

З сярэдзіны ліпеня 2024 года асабіста прыбыць у Акадэмію МУС з пашпартам для падачы арыгіналаў дакумента аб адукацыі (атэстат або дыплом з дадаткам), сертыфікатаў цэнтралізаванага тэсціравання, праведзенага ў Рэспубліцы Беларусь у 2024 годзе, даведак сельскага выканаўчага камітэта, дакументаў на льготы.

Абітурыенты, якія прайшлі па конкурсе на дзённую форму навучання, да канца ліпеня 2024 года залічваюцца ў Акадэмію МУС і прымаюцца на службу ў органы ўнутраных спраў Рэспублікі Беларусь. Перад залічэннем яны праходзяць канчатковы медыцынскі агляд непасрэдна ў акадэміі ў адпаведнасці з нарматыўнымі прававымі актамі. З імі заключаецца кантракт, які прадугледжвае абавязковае праходжанне службы ў органах унутраных спраў на працягу тэрміну навучання ў Акадэміі МУС, а таксама не менш за пяць гадоў пасля яе заканчэння ў падраздзяленнях Следчага камітэта Рэспублікі Беларусь.

Тэрмін атрымання вышэйшай адукацыі складае чатыры гады.

Акадэмія МУС знаходзіцца па адрасе: г. Мінск, пр. Машэрава, 6. Больш падрабязную інфармацыю можна даведацца на сайце ўстановы: www.academy.mia.by.

У Гродзенскім дзяржаўным універсітэце імя Я. Купалы на юрыдычным факультэце таксама рыхтуюць спецыялістаў па кваліфікацыі “юрыст” па мэтавым накіраванні ў інтарэсах Следчага камітэта Рэспублікі Беларусь. Сістэма льготаў пры паступленні будзе такая ж, як у Акадэміі МУС, а пасля 4-х гадоў навучання курсантам таксама прысвойваецца спецыяльнае званне “лейтэнант юстыцыі”. Алгарытм падачы дакументаў аналагічны: да красавіка 2024 года трэба паспець звярнуцца ў раённы аддзел Следчага камітэта.

У чым адрозненне? Абітурыенты, якія паступаюць для атрымання вышэйшай адукацыі на ўмовах мэтавай падрыхтоўкі, здаюць у ГрДУ імя Я. Купалы адзін унутраны ўступны іспыт па вучэбным прадмеце “грамадазнаўства”, які вызначаны прадметам першага профільнага іспыту. Уступнае выпрабаванне можа праводзіцца ў вуснай, пісьмовай ці практычнай форме. Залічэнне абітурыентаў для атрымання вышэйшай адукацыі на ўмовах мэтавай падрыхтоўкі праводзіцца па конкурсе на аснове агульнай сумы балаў, падлічанай па выніках здачы ўнутранага ўступнага іспыту ВНУ і сярэдняга бала атэстата аб агульнай сярэдняй адукацыі.

ГрДУ імя Я. Купалы знаходзіцца па адрасе: г. Гродна, вул. Ажэшкі, 25. Больш падрабязную інфармацыю можна даведацца на сайце ўстановы www.grsu.by.

Па пытаннях, якія тычацца паступлення на следчыя спецыяльнасці, звяртайцеся ў раённы аддзел Следчага камітэта па тэлефоне 6-46-20.

Таццяна ПРАТАКОВІЧ,
начальнік раённага аддзела Следчага камітэта

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga