Праводзілі на службу ў армію

8 лістапада стаў адметным днём для 57 юнакоў Дзятлаўскага раёна, для якіх хутка пачнецца новы этап у жыцці – служба ва Узброеных Сілах Рэспублікі Беларусь. Для будучых ваеннаслужачых у раённым Цэнтры культуры і творчасці адбыліся ўрачыстыя провады ў армію. Арганізатары пастараліся стварыць святочную атмасферу, каб мерапрыемства надоўга запомнілася прызыўнікам і іх блізкім.

Ваенны камісар Дзятлаўскага раёна Генадзь Суравец уручыў юнакам павесткі ў армію. А таксама даў наказ: актыўна ўліцца ў вайсковы строй, хутка авалодаць сучасным узбраеннем і тэхнікай, каб на высокім узроўні выконваць пастаўленыя камандаваннем задачы. Генадзь Тадэвушавіч пажадаў хлопцам вярнуцца дадому здаровымі, а бацькам – спакою і цярпення.

Ад імя раённага выканаўчага камітэта, раённага Савета дэпутатаў пажаданне прызыўнікам выказаў намеснік начальніка аддзела ідэалагічнай работы, культуры і па справах моладзі райвыканкама, старшыня Дзятлаўскай раённай арганізацыі грамадскага аб’яднання Беларускага саюза афіцэраў Аляксандр Камароў:

— Хутка варотамі ў звыклы лад жыцця, дзе застануцца бацькі, сябры, любімая дзяўчына, для вас стане кантрольна-прапускны пункт вайсковай часці. І непрыкметна ва ўжытак увойдуць такія паняцці, як статут, марш-кідок, нарад. Спадзяюся, што служба не акажацца для вас руціннай, а стане сапраўднай школай мужнасці. Наперадзе вас чакаюць ратныя справы, новыя сябры, разам з якімі трэба ахоўваць мір і спакой нашай дзяржавы. Будзьце цвёрдымі і настойлівымі ў авалодванні ваеннай навукай, набывайце вопыт – ён спатрэбіцца вам у далейшым. Памятайце пра тых, хто чакае дома.

Цёпла і пранікнёна гаварыла матуля аднаго з прызыўнікоў Ірына Цяцерына. Яна пажадала юнакам моцнага здароўя, лёгкай службы, добрых камандзіраў, армейскага сяброўства.

Прызыўнік Дзмітрый Максімчык ад імя прысутных юнакоў падзякаваў бацькам за падтрымку, арганізатарам – за падрыхтаваную ўрачыстасць. А ўсе разам прызыўнікі далі сімвалічнае абяцанне абараняць, берагчы мір і грамадзянскую згоду, якія з’яўляюцца асноўнымі каштоўнасцямі грамадства, стаць выдатнікамі баявой падрыхтоўкі, не запляміць гонар і патрыятычныя традыцыі дзядоў, бацькоў, старэйшых братоў.

Цудоўныя песні, нумары мастацкай самадзейнасці падарылі прысутным Ганна Харлінская, Ала Чарняўская, Іван Кашко, Уладзіслаў Ракуць, Таццяна Дудкіна, юныя артысткі цыркавой студыі “Марсі”, вядучыя канцэртнай праграмы Наталля Маліноўская і Анастасія Голуб.

І. КАМАРОВА
Фота Н. АВЯРЧУК