У Дзятлаве прайшло пасяджэнне Савета раённага аб’яднання прафсаюзаў.
Удзел у ім прынялі старшыні раённых і пярвічных прафсаюзных арганізацый, намеснік старшыні Гродзенскага абласнога аб’яднання прафсаюзаў Андрэй Кардаш.
На парадак дня былі вынесены пытанні аб разглядзе рашэнняў Х пленума Савета Федэрацыі прафсаюзаў Беларусі і прыняцці мер па іх рэалізацыі ў 2019 годзе; аб удзеле прафсаюзных арганізацый, якія ўваходзяць у ФПБ, у падрыхтоўцы і правядзенні выбараў у Палату прадстаўнікоў Нацыянальнага сходу Рэспублікі Беларусь сёмага склікання; аб скліканні справаздачна-выбарнай канферэнцыі Дзятлаўскага раённага аб’яднання прафсаюзаў.
Старшыня раённага аб’яднання прафсаюзаў Андрэй Сатараў у сваім выступленні адзначыў, што спецыфіка прафсаюзнай работы шматгранная: гэта выкананне Пагаднення з Дзятлаўскім раённым выканаўчым камітэтам і наймальнікамі раёна, работа з калектыўнымі дагаворамі арганізацый, маніторынг праблемных пытанняў у галіне аплаты працы, занятасці, сацыяльных гарантый, цэн, аховы працы, супрацоўніцтва з ветэранамі і моладдзю. Адзін з асноўных накірункаў дзейнасці прафсаюзаў – прававая абарона. Гэта дапамога ў судовых пасяджэннях, аднаўленне на працоўных месцах.
На пасяджэнні таксама выступілі Станіслаў Фабішэўскі, старшыня раённай арганізацыі Беларускага прафсаюза работнікаў адукацыі і навукі; Алена Абрамчык, прадстаўнік па сувязях з грамадскасцю; Сяргей Малышчык, прафсаюзны інспектар па ахове працы.
Андрэй Кардаш расказаў аб асноўных напрамках дзейнасці Гродзенскага абласнога аб’яднання прафсаюзаў, аб саветах па працоўных і сацыяльных пытаннях, неабходнасці экспертызы пры заключэнні калектыўных дагавораў. Звярнуў увагу на тое, што павінна быць на прафсаюзным стэндзе, на работу па зваротах грамадзян, кантрактную форму найму, выязныя прыёмы грамадзян і іншыя пытанні.
Напрыканцы сходу адзінагалосна была прынята пастанова Савета Дзятлаўскага раённага аб’яднання прафсаюзаў па асноўным пытанні парадку дня.
Вольга ЮШКЕВІЧ
