Прафсаюзны прыём. Аднавіць парушаныя правы

Нагадаю, што ў сакавіку 2015 года Федэрацыя прафсаюзаў Беларусі запусціла новы праект: кожны апошні чацвер месяца прававыя інспектары Федэрацыі выязджаюць у розныя раёны краіны, прапаноўваючы бясплатную юрыдычную дапамогу. Па словах галоўнага прававога інспектара працы Гродзенскай абласной арганізацыі Беларускага прафсаюза работнікаў мясцовай прамысловасці і камунальна-бытавых прадпрыемстваў Вольгі Калінка, якая чарговую выязную сустрэчу правяла ў Дзятлаве ў рэдакцыі раённай газеты і ў раённым аб’яднанні прафсаюзаў, такая форма работы мае пэўныя перавагі ў параўнанні са звычайнай юрыдычнай кансультацыяй.

– Кансультацыі ажыццяўляюцца ў раённых цэнтрах, гарадскіх пасёлках, у арганізацыях і на прадпрыемствах. Гэта значыць, што грамадзянам не трэба ехаць у абласны цэнтр або сталіцу, каб пабываць на прыёме ў юрыста, часта людзі могуць атрымаць юрыдычныя парады прама на працоўным месцы, бо кожны раз мы праводзім прыёмы на базе розных арганізацый і структур, – адзначыла Вольга Уладзіміраўна.

У сустрэчы з грамадзянамі таксама прымалі ўдзел намеснік пракурора Дзятлаўскага раёна Аляксандр Юркевіч і старшыня Дзятлаўскага аб’яднання прафсаюзаў Андрэй Сатараў.

Да спецыялістаў звярнуліся дзятлаўчане з пытаннямі, якія тычацца незаконнага звальнення, адмовы ў аказанні дапамогі работніку арганізацыі і іншымі. На ўсе пытанні заяўнікі атрымалі вычарпальныя адказы.

— Аналіз зваротаў паказвае, што асноўная маса праблем, з якімі людзі прыходзяць да прафсаюзных інспектараў, закранаюць працоўную дзейнасць (каля 60 %). Другімі па актуальнасці з’яўляюцца пытанні прымянення жыллёвага заканадаўства, на трэцім месцы – пенсійнага, — падкрэсліла напрыканцы прыёму Вольга Калінка.

Ірына КАМАРОВА

Фота Вольгі ЮШКЕВІЧ