Прафарыентацыя. Як старшакласнікі вывучалі ваенную прафесію

Навучэнцы 10-11 класаў Дзятлаўскага раёна пабывалі на прафарыентацыйнай экскурсіі – ваенным факультэце Гродзенскага дзяржаўнага ўніверсітэта імя Янкі Купалы.

Тут рыхтуюць не толькі тых, хто будзе стаяць на перадавой, але і тых, хто забяспечвае саму магчымасць службы і перамогі. Навучэнцам падрабязна расказалі аб спецыяльнасці “Тылавое забеспячэнне войскаў”, а таксама аб падрыхтоўцы інструктараў па фізічнай культуры.

Асаблівую ўвагу афіцэры-настаўнікі надалі важнасці і маштабу прафесіі тылавіка. Як абсалютна дакладна заўважылі вайскоўцы: “Без тылу няма перамогі”, бо менавіта ад надзейнага забеспячэння, арганізацыі харчавання і зладжанай працы транспарту залежыць боегатоўнасць усяго войска.

Прадстаўнікі факультэта дэталёва растлумачылі асаблівасці ўступнай кампаніі, патрабаванні да кандыдатаў і нюансы самой вучобы, старшакласнікі ўбачылі, як жывуць курсанты, наведалі навучальныя класы, дзе будучыя тылавікі асвойваюць складаныя дысцыпліны, і ацанілі строгі, але дружны курсанцкі побыт.

У час размовы з курсантамі школьнікі змаглі больш падрабязна распытаць іх пра навучальныя будні, распарадак дня, армейскія традыцыі і з першых вуснаў даведацца пра ўсе нюансы навучання на факультэце.

Самай запамінальнай часткай экскурсіі стала наведванне інтэрактыўнай пляцоўкі. Навучэнцам тут далі магчымасць паспрабаваць свае сілы ў стральбе з аўтамата Калашнікава і пісталета Макарава ў сучасным электронным ціры. Рызыка і засяроджанасць пры першых дакладных пападаннях выклікалі ў старшакласнікаў масу эмоцый. Не менш захапляльным было знаёмства з сучаснымі тэхналогіямі на полі бою: школьнікі паспрабавалі пілатаваць беспілотны лятальны апарат, а таксама бліжэй азнаёміліся з узорамі ўзбраення.

А яшчэ ўсіх пачаставалі сапраўднай салдацкай кашай, якую прыгатавалі самі курсанты.

Паездка ў ГрДУ імя Янкі Купалы для кагосьці са школьнікаў стала магчымасцю праверыць сваю гатоўнасць да строгіх вайсковых будняў, а для іншых – канчатковым пацвярджэннем мары надзець афіцэрскія пагоны. Бо сапраўдная абарона Радзімы пачынаецца не толькі з мужнасці ў баі, але і з граматнага, надзейнага тылу і выдатнай фізічнай падрыхтоўкі.

Аляксандр НІЧЫПАРОВІЧ,
кіраўнік па ваенна-патрыятычным выхаванні сярэдняй школы № 1 г. Дзятлава імя А. М. Чурылы

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga