Праект “Жамчужыны зямлі Дзятлаўскай”. Сакрэт даўгалецця – вера ў свае сілы

У рамках сацыяльна-культурнага праекта “Глыбінкай жыве Беларусь” творчы калектыў сектара нестацыянарнага абслугоўвання насельніцтва раённага Цэнтра культуры і народнай творчасці здзейсніў культурна-пазнавальную экспедыцыю “Па сакрэты даўгалецця” ў вёску Юравічы да цудоўнай жанчыны-працаўніцы Ганны Дракель, якая сёлета адзначыла сваё 85-годдзе. Артысты павіншавалі яе з юбілеем, разгаварыліся.

Ганна Георгіеўна гаворыць, што ў яе доўгім жыцці ўсяго хапала – і радасці, і выпрабаванняў, але на ўсё знаходзіліся сілы:  

– Дзяцінства маё было, можна сказаць, не вясёлым, бо ці шмат мы маглі сабе дазволіць у той цяжкі ваенны і пасляваенны час. Бацьку забралі на фронт, з маленькаю мной мама засталася адна. Цяжка нам было, але неяк выжывалі, як усе. Скончыла я 10 класаў, а далей вучыцца не пайшла – вельмі хварэла матуля. Ужо ў 16 гадоў я пайшла працаваць на вінзавод у Дзятлаве. Там знайшла сваё сямейнае шчасце: пазнаёмілася з хлопцам Мечыславам з вёскі Страла, які таксама працаваў на заводзе. Хутка мы пажаніліся, і пайшло жыццё сваім ладам. Нарадзіліся ў нас дачка Ала і сын Сяргей. Жылі спачатку ў старэнькай хаце, але вымушаны былі пабудаваць новы дом у вёсцы Юравічы, дзе я жыву разам з дачкой Алай і цяпер.

Вялікую частку сваёй працоўнай дзейнасці, а склала яна 40 гадоў, я аддала сельскай гаспадарцы. Была фуражырам, 13 гадоў працавала звеннявой ільнаводчай брыгады ў калгасе “Чырвоны Кастрычнік”. Як бы цяжка ні было, я старалася, дарэчы, як і ўсё наша пасляваеннае пакаленне, працаваць сумленна. І лічу, што давер кіраўніцтва калгаса апраўдала, бо нездарма ж атрымала шмат высокіх узнагарод – Ганаровую грамату Вярхоўнага Савета БССР, два ордэны Працоўнай Славы 2-й і 3-й ступені, з’яўлялася пераможцай сацыялістычных спаборніцтваў, ударнікам 9-й і 10-й пяцігодкі, атрымала дзве ўзнагароды за поспехі ў народнай гаспадарцы. А яшчэ я з’яўлялася дэпутатам раённага Савета дэпутатаў.

Выпала на маю долю і выпрабаванне цяжкай хваробай, але я не здалася, змагаюся, як магу, таму і сустрэла такі важкі юбілей. А сакрэт майго даўгалецця – гэта вера ў свае сілы ды вялікае жаданне жыць, каб дапамагаць дзецям, унукам і праўнукам.

Ужо шмат гадоў я на пенсіі, аднак стараюся працаваць, выконваю нецяжкія дамашнія справы. Дастаўляе мне душэўную асалоду вырошчванне кветак на сваім падворку. Вельмі  ўдзячная сваёй дачцэ Але, якая дапамагае мне па-гаспадарцы, падтрымлівае мой фізічны і маральны стан. Жадаю маладому пакаленню здароўя, паважаць і берагчы адзін аднаго, не цурацца фізічнай працы.

Святлана ГРЫШЫНА

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga

#годбелорусскойженщины