Перапіс насельніцтва, выбары і бяспека

17 кастрычніка на Дзятлаўшчыне прайшоў Адзіны дзень інфармавання насельніцтва па тэмах: “Нацыянальны сход Рэспублікі Беларусь – прадстаўнічы і заканадаўчы орган беларускай дзяржавы”, “Сітуацыя па ўзнікненні пажараў на тэрыторыі Гродзенскай вобласці”.

У раёне працавалі некалькі інфармацыйных груп, якія правялі сустрэчы з працоўнымі калектывамі раёна і грамадзянамі па месцы жыхарства.

Абласную інфармацыйную групу ўзаначаліла намеснік генеральнага дырэктара вытворчага рэспубліканскага ўнітарнага прадпрыемства “Гроднааблгаз” Алена Мацвеянок.

У рамках Адзінага дня інфармавання абласная група правяла адразу некалькі сустрэч на тэрыторыі раёна. Першай прайшла сустрэча з калектывам работнікаў Слонімскага вытворчага ўчастка “Дзятлаўскі раён газазабеспячэння”, затым адбылася інфармацыйная сустрэча з насельніцтвам Дварэцкага сельсавета.

Раённая інфармацыйна-прапагандысцкая група на чале са старшынёй Дзятлаўскага райвыканкама Аляксандрам Дубовікам працавала ў сярэдняй школе № 1 горада Дзятлава.

Па пытанні “Нацыянальны сход Рэспублікі Беларусь – прадстаўнічы і заканадаўчы орган беларускай дзяржавы” было адзначана, што ў адпаведнасці з указамі Прэзідэнта Рэспублікі Беларусь прызначаны выбары ў Нацыянальны сход Рэспублікі Беларусь. Першымі пройдуць выбары ў Савет Рэспублікі, якія адбудуцца 7 лістапада, 17 лістапада пройдуць выбары ў Палату прадстаўнікоў.

Прадстаўнікі інфармацыйна-прапагандысцкіх груп падрабязна спыніліся на пытанні развіцця Інстытута парламентарызму ў нашай рэспубліцы, прававой аснове і ключавых накірунках дзейнасці Нацыянальнага сходу Рэспублікі Беларусь, складзе і дзейнасці Палаты прадстаўнікоў і Савета Рэспублікі, рабоце камісій па вядзенні заканадаўча-праектнай работы, зменах і карэкціроўках у заканадаўстве, міжнароднай і міжпарламенцкай дзейнасці Нацыянальнага сходу Рэспублікі Беларусь.

Акрамя гэтага, увага прысутных была скіравана на падрыхтоўку і парадак правядзення выбараў, формах перадвыбарчай агітацыі, ходзе галасавання і падліку галасоў выбаршчыкаў. Была засяроджана ўвага на магчымасцях прыняцця ўдзелу ў датэрміновым галасаванні на працягу пяці дзён да канкрэтнай даты выбараў, а таксама магчымасці выкарыстання права на галасаванне па месцы знаходжання для тых грамадзян, якія па стане здароўя або іншых уважлівых прычынах не могуць прыйсці ў дзень выбараў у памяшканне для галасавання. Асобна былі разгледжаны выбарчыя правы грамадзян, якія знаходзяцца за мяжой.

У час выступленняў было адзначана, што ў ходзе правядзення выбараў палепшацца ўмовы выбаршчыкаў з абмежаванымі магчымасцямі. Спецыяльна для іх будуць устаноўлены спецыяльныя кабіны для галасавання з нізкім сталом. Трансляцыі выступленняў кандыдатаў будуць вяшчацца тэлекампаніямі ў суправаджэнні субтытраў або з сурдаперакладам для выбаршчыкаў, якія маюць абмежаваныя магчымасці па слыху. Будуць выкарыстоўвацца трафарэты для самастойнага галасавання грамадзян, якія маюць абмежаваныя магчымасці па зроку.

Адной з інавацый сёлетніх выбараў стала распрацоўка мабільнага дадатку да смартфонаў, па якой выбаршчык зможа вызначыць акругу і месцазнаходжанне свайго ўчастка.

Адным з важных момантаў у ходзе інфармацыйных сустрэч стала абмеркаванне сітуацыі з пажарамі ў нашай краіне. У сваіх выступленнях супрацоўнікі Дзятлаўскага РАНС прывялі статыстычныя даныя аб пажарах, якія адбыліся ў раёне, вобласці і па рэспубліцы ў цэлым, давялі інфармацыю аб асноўных прычынах узнікнення пажараў і аб тым, якія меры неабходна прадпрымаць для таго, каб засцерагчы сябе, сваіх блізкіх і ўласную нерухомасць ад бяды.

Як адзначылі ратаўнікі, асноўным месцам узнікнення пажараў з гібеллю на іх людзей па-ранейшаму застаецца жылы сектар. Асноўныя прычыны гібелі – неасцярожнасць пры курэнні, адсутнасць аўтаномных пажарных апавяшчальнікаў.

Супрацоўнікі РАНС заклікалі насельніцтва сачыць за спраўнасцю электраправодкі ў жылых памяшканнях, не грэбаваць нормамі, якія прад’яўляюцца да пячнога ацяплення, быць пільнымі пры распальванні вогнішчаў. Ратаўнікі прапанавалі своечасова ўстанаўліваць аўтаномныя пажарныя апавяшчальнікі, што дазволіць грамадзянам аператыўна прыняць меры па ліквідацыі ачагоў узгарання.

Па заканчэнні інфармацыйнага мерапрыемства спецыялісты адзначылі, што ў ходзе падобных сустрэч важна не толькі данесці інфармацыю да работнікаў раённых прадпрыемстваў і арганізацый, жыхароў раёна, але і адказаць на актуальныя і хвалюючыя пытанні грамадзян, растлумачыць іх і даць канкрэтныя рэкамендацыі.

Аксана АНДАЛЮКЕВІЧ