Кожнага з нас яшчэ з дзяцінства вучаць не пакідаць свае рэчы без нагляду, каб не аказацца ў непрыемнай сітуацыі, калі вяртаешся, а месца – апусцела.
Што на гэты конт думаюць праваахоўнікі, расказала старшы следчы раённага аддзела Следчага камітэта Ірына Яновіч:
– Прафілактыка крадзяжоў маёмасці, пакінутай у грамадскіх месцах, застаецца тэмай, якая патрабуе ўвагі і свядомых паводзінаў кожнага чалавека. Падобныя крадзяжы могуць адбывацца з-за недастатковай увагі да сваіх рэчаў або грэбавання мерамі бяспекі.
Каб не быць галаслоўнай, прывяду некалькі ключавых правілаў, якія дапамогуць папярэдзіць крадзяжы ў грамадскіх месцах і пазбегнуць непрыемнасцяў.
Першы і асноўны прынцып, якім варта скарыстацца, гэта не пакідаць каштоўныя рэчы ў людных месцах без нагляду, нават калі адлучаецеся на кароткі час. Сумкі, кашалькі, тэлефоны могуць прывабіць нячыстых на руку грамадзян, таму іх найлепш забраць з сабой, а ў магазіне ці гандлёвым цэнтры – пакінуць у спецыяльнай ячэйцы.
Не трэба губляць пільнасці: заўжды звяртайце ўвагу на людзей побач. Калі заўважаеце падазроныя паводзіны ці сітуацыю, звярніцеся да супрацоўніка службы аховы або ў міліцыю.
Значна зменшыць верагоднасць крадзяжу дапамагаюць замкі на сумках і рукзаках, а таксама замыкаючыя прыстасаванні для веласіпедаў, а калі іх ставіць яшчэ і ў полі зроку відэакамер, якімі на сёння забяспечаны многія аб’екты гандлю і адпачынку, то рызыка мінімізуецца.
Сярод вялікай колькасці людзей не варта дэманстраваць дарагія рэчы і ўпрыгажэнні, бо гэта прыцягне занадта пільную ўвагу да вашай асобы, і злодзеі змогуць адсачыць, калі вы акажацеся ў менш людным месцы і згубіце пільнасць.
Яшчэ адзін важны момант: вучыце гэтым і іншым правілам бяспечных паводзінаў сваіх дзяцей змалку, тады яны стануць для іх звычкай і засцерагуць ад многіх непрыемнасцяў у далейшым жыцці.
Ірына СТЫРНІК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
