Па здароўе – у лазню

Карысць лазні для арганізма чалавека вядомая са старажытных часоў.

Нашы далёкія продкі правільна лічылі, што рэгулярнае наведванне парыльні дазваляе ўмацаваць здароўе, пазбавіць арганізм ад шкодных рэчываў, захаваць маладосць і падоўжыць жыццё. Яна карысная як для фізічнага, так і для маральнага здароўя, гэта выдатнае месца для таго, каб надаць увагу сабе і свайму целу, аздаравіцца і павысіць настрой. Сапраўдныя аматары лазні сцвярджаюць, што прыняцце ванны ці душа ніколі не падорыць таго ж адчування лёгкасці, чысціні і абнаўлення, як наведванне парыльні. Многія жыхары Дзятлаўшчыны таксама з’яўляюцца аматарамі лёгкай пары.

На балансе Дзятлаўскага РУП ЖКГ знаходзяцца чатыры лазні: у горадзе Дзятлаве, гарадскіх пасёлках Наваельня і Казлоўшчына, аграгарадку Дварэц. У сельскіх гаспадарках раёна працуюць сем лазняў – у аграгарадках Хвінявічы, Круцілавічы, Войневічы, Белагурна, Вензавец, у вёсцы Руда Яварская. У лазні ў аграгарадку Жукоўшчына цяпер ідзе рамонт. Сёлета абнаўленні ўжо адбыліся ў лазнях у Дзятлаве, Наваельні і Казлоўшчыне. Там былі адрамантаваны печы, заменена абшыўка парыльняў, паліцы.

Цэны на наведванне лазняў у раёне даступныя – ад 1 да 6 рублёў, таму па здароўе і добры настрой сюды можна і неабходна хадзіць.

Дзятлаўчане падзяліліся сваімі меркаваннямі, чаму яны наведваюць лазні.

Уладзімір Казак: “У лазню я хаджу часта, люблю менавіта папарыцца. Выходзіш з парыльні – быццам зноў нарадзіўся, адразу адчуваеш, што арганізм аднаўляецца. Лазня для мяне – гэта не проста схадзіць памыцца, гэта турбота аб здароўі. Мне падабаецца, што на наступную раніцу пасля наведвання лазні прачынаешся свежым, поўным сілаў і энергіі”.

Алена Варабей: “Я хаджу ў дзятлаўскую лазню ўжо шмат гадоў. Гэта для мяне не толькі прыемны від адпачынку, але і выдатны спосаб амаладжэння, ачышчэння арганізма. Лазня дапамагае мне адчуць сябе шчаслівым чалавекам, з якога змылі ўвесь негатыў, павышае настрой, дабаўляе бадзёрасці. А пасля лазні абавязкова трэба выпіць травянога чаю, які яшчэ больш падмацуе здароўе”.

Святлана ГРЫШЫНА
Фота Вольгі ЮШКЕВІЧ