Незабыўныя старонкі ваенных гадоў. За летапіс аграгарадка – дыплом II ступені

Вялікая Айчынная вайна пакінула глыбокі след у гісторыі беларускага народа. На акупаванай тэрыторыі Беларусі тры гады шугала полымя ўсенароднага супраціўлення нямецка-фашысцкім захопнікам. У барацьбе з нямецкімі агрэсарамі Беларусь страціла кожнага чацвёртага жыхара.  

З мэтай захавання гістарычнай памяці пра падзеі Вялікай Айчыннай вайны і ўклад беларускага народа ў дасягненне Перамогі для навучэнцаў установаў агульнай сярэдняй адукацыі праводзяцца мерапрыемствы рэспубліканскай героіка-патрыятычнай акцыі “Вялікай Перамозе – 80!”.

Работа навучэнцаў 8 класа Дварэцкай сярэдняй школы Мацвея Жэвагі і Валерыі Чорненькай “Летапіс аграгарадка Дварэц” удастоена дыплома ІІ ступені на абласным этапе рэспубліканскага конкурсу “Летапіс Вялікай Перамогі”. У ходзе пошукава-даследчай дзейнасці навучэнцы сабралі, сістэматызавалі і творча прадставілі інфармацыю аб пачатку вайны, перыядзе акупацыі, баявых дзеяннях, партызанскім і падпольным руху, генацыдзе мірных жыхароў, вызваленні, пачатку аднаўлення Дварца.

На абласны этап рэспубліканскага конкурсу “Іх імёны ў гісторыі Перамогі” прадстаўлены інфармацыйны каталог аб земляках, звязаных з падзеямі Вялікай Айчыннай вайны. Мацвей Жэвага і Міхаіл Варнакоў папоўнілі і сістэматызавалі звесткі пра салдат, партызан  і падпольшчыкаў, ураджэнцаў і жыхароў Дварэцкага сельскага савета, якія змагаліся з ворагам.

Удзел у рэспубліканскай героіка-патрыятычнай акцыі “Вялікай Перамозе – 80!” – гэта мэтанакіраваны крок навучэнцаў школы да захавання гістарычнай памяці аб вайне і кожнай з яе падзей, за якімі стаяць асобныя людзі, у тым ліку нашы землякі.

Марына ІГНАЦІК,
настаўніца Дварэцкай сярэдняй школы

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga

#Дятловщина #образование