Пра развіццё раёна і знешнюю палітыку

Адзіны дзень інфармавання прайшоў 18 красавіка на Дзятлаўшчыне.

Яго тэмы: “Знешняя палітыка Рэспублікі Беларусь. Рэалізацыя нацыянальных інтарэсаў і ўмацаванне пазітыўнага іміджу беларускай дзяржавы на міжнароднай арэне”; “Сістэма аздараўлення насельніцтва ў Рэспубліцы Беларусь”; “Папярэджанне пажараў і гібелі людзей ад іх у пажаранебяспечны вяснова-летні перыяд”. У рамках рэспубліканскай акцыі “Дом без гвалту” было разгледжана пытанне  “Папярэджанне гвалту ў сям’і, меры прафілактычнага ўздзеяння да асоб, якія здзяйсняюць гвалт”.

Інфармацыйная група старшыні райвыканкама Аляксандра Дубовіка сустрэлася з калектывам КСУП “Хвінявічы”, работнікамі мясцовых устаноў і арганізацый, насельніцтвам аграгарадка Хвінявічы.

На пачатку сустрэчы былі разгледжаны вынікі сацыяльна-эканамічнага развіцця Дзятлаўскага раёна ў 2018 годзе і задачы па выкананні прагнозу сацыяльна-эканамічнага развіцця на 2019 год. З дакладам выступіў Аляксандр Дубовік.

Ён звярнуў увагу на выкананне планавых паказчыкаў вытворчасці валавой прадукцыі, фінансава-эканамічную стабільнасць прадпрыемстваў раёна, развіццё знешнеэканамічнай дзейнасці па экспарце тавараў і паслуг. Была адзначана тэндэнцыя памяншэння беспрацоўя ў раёне і колькасць павелічэння працаўладкаваных грамадзян. Кіраўнік раёна скрупулёзна прааналізаваў сітуацыю ў прамысловай галіне і аграпраме, не абышоў увагай сацыяльную сферу. Разам са станоўчымі фактамі, Аляксандр Міхайлавіч адзначыў моманты недапрацовак у асобных прадпрыемствах.

Па пытанні  “Знешняя палітыка Рэспублікі Беларусь. Рэалізацыя нацыянальных інтарэсаў і ўмацаванне пазітыўнага іміджу беларускай дзяржавы на міжнароднай арэне” выступіла галоўны спецыяліст аддзела ідэалагічнай работы, культуры і па справах моладзі райвыканкама Ала Барысенка:

– Наша краіна прытрымліваецца адзіных падыходаў да развіцця адносін з усімі замежнымі партнёрамі як на Усходзе, так і на Захадзе.

Асноўным стратэгічным саюзнікам Рэспублікі Беларусь па-ранейшаму застаецца Расійская Федэрацыя. Абедзве краіны эфектыўна развіваюць сваё гандлёва-эканамічнае, інвестыцыйнае і інавацыйнае супрацоўніцтва.

Акрамя гэтага, Беларусь з’яўляецца актыўным удзельнікам Еўразійскага эканамічнага саюза. Наша краіна прыкладае значныя намаганні для хутчэйшага выхаду на забеспячэнне ў ЕАЭС свабоднага перамяшчэння тавараў, паслуг, капіталаў і працоўнай сілы без выключэнняў і абмежаванняў, а таксама рэалізацыі ўзгодненай палітыкі ў ключавых сектарах эканомікі. На гэта будуць накіраваныя ў тым ліку прыярытэты старшынства Беларусі ў органах ЕАЭС у 2020 годзе.

Таксама ў час сустрэчы былі разгледжаны пытанні па арганізацыі работы камісіі па аздараўленні і санаторна-курортным лячэнні насельніцтва на прадпрыемствах і ва ўстановах, звернута ўвага на пералік катэгорый грамадзян, якім прадастаўляецца права на санаторна-курортнае лячэнне  і аздараўленне з выкарыстаннем сродкаў дзяржаўнага сацыяльнага страхавання і рэспубліканскага бюджэту, а таксама з частковай аплатай. Адзначаны катэгорыі дзяцей, бацькі якіх маюць права на набыццё пуцёвак у летнікі за кошт дзяржаўных сродкаў. Па гэтым пытанні выступіла начальнік аддзела адукацыі райвыканкама Наталля Белаус.

Аксана АНДАЛЮКЕВІЧ