Як і было запланавана, другі этап рэспублканскай акцыі “Бяспека – у кожны дом” праходзіў ва ўстановах спецыяльнай адукацыі. На Дзятлаўшчыне гэта – філіял “Казлоўшчына” Слонімскага сельскагаспадарчага каледжа. Галоўнай мэтавай аўдыторыяй сталі навучэнцы першага і другога курсаў філіяла.
З відэароліка, які быў прадэманстраваны на пачатку сустрэчы, прысутныя даведаліся аб парадку дзеянняў у выпадку атрымання гукавога сігналу “Увага!”, замацавалі правілы паводзінаў у розных надзвычайных сітуацыях.
Інспектар Дзятлаўскага раённага аддзела па надзвычайных сітуацыях А. Беленка нагадаў юнакам і дзяўчатам, што большасць з іх, якія жывуць у інтэрнаце навучальнай установы, павінны асабліва ўважліва сачыць за выкананнем правілаў пажарнай бяспекі. У выпадку, калі нехта з іх паспрыяе надзвычайнай сітуацыі ў жылым памяшканні, будзе несці адказнасць не толькі за сябе, але і за тых, хто жыве побач.
У ходзе дэталёвага разбору выпадкаў і прычын пажараў высветлілася, што ў большасці прысутных ёсць сваякі або знаёмыя, якія сталі пацярпелымі ад вогненнай стыхіі. І надзвычайная сітуацыя, якая на першы погляд здаецца далёкай і нерэальнай, з-за абыякавасці і неасцярожнасці можа здарыцца побач з намі.
Навучэнцы замацавалі атрыманыя веды, яшчэ раз паўтарылі элементарныя правілы пажарнай бяспекі ў форме віктарыны, за якую атрымалі прызы ад ратаўнікоў – кнігі-памяткі.
Н. АВЯРЧУК
Фота аўтара
