“Матуліны пірагі” – для сыноў Айчыны

23 лютага прадстаўніцы Дзятлаўскай раённай арганізацыі Беларускага саюза жанчын наведалі вайсковую часць 33933.

Яны падтрымалі абласную акцыю “Матуліны пірагі” саюза жанчын, прымеркаваную да Дня абаронцаў Айчыны і 105-годдзя Узброеных Сіл Рэспублікі Беларусь, прыехалі павіншаваць са святам сваіх землякоў, якія праходзяць ваенную службу, падрыхтавалі для салдат святочны каравай, дамашняе печыва і яблыкі з уласнага саду і ўручылі іх з пажаданнямі.

– Нашы матулі, жанчыны, дочкі віншуюць юнакоў, якія праходзяць тэрміновую службу ў войску. На жаль, у Дзятлаўскім раёне няма вайсковай часці, землякі служаць у іншых рэгіёнах Беларусі. Таму мы прынялі рашэнне далучыцца да акцыі і наведаць нашых вайскоўцаў у Слоніме, павіншаваць іх са святам, – расказала старшыня раённай арганізацыі БСЖ, начальнік упраўлення па працы, занятасці і сацыяльнай абароне райвыканкама Алена Васкель. – Жадаю ўсім нашым мужчынам, каб у нашай краіне ніколі не было ваенных падзей, не грымелі выбухі і ўсе салдаты служылі на мірнай зямлі. Шчасця, здароўя, дабрабыту і ўзаемаразумення.

– Мы, матулі, у якіх сыны таксама служаць Айчыне, ганарымся вамі і чакаем дадому ўзмужнелымі, моцнымі і загартаванымі, – далучылася да віншаванняў Таццяна Нікіпорчык.

У 11 гвардзейскай механізаванай брыгадзе мотастралковага палка часці 33933 радавым служыць наш зямляк, дзятлаўчанін Уладзіслаў Сянкевіч. Ён з’яўляецца механікам-электрыкам аўтамабіля “Урал 2320”. Малады чалавек прызваўся ў рады Узброеных Сіл Рэспублікі Беларусь у маі мінулага года. Першай тэхнікай, якую асвойваў салдат, быў танк, затым яго перавялі вадзіцелем аўтамабіля. Па накіраванні камандавання Уладзіслаў вучыўся на вадзіцельскіх курсах, па заканчэнні якіх атрымаў катэгорыю “С”.

– Раней я захапляўся тэхнікай і электронікай, а тут, у арміі, пачаў разбірацца ў механіцы, рамонце аўтамабіляў, і мне гэта падабаецца, – расказаў Уладзіслаў. – Кожны дзень выконваем шмат задач, цяпер пасля вучэнняў на Горскім палігоне прыводзім машыны ў парадак. Свята абаронцаў Айчыны сустрэлі святочным пастраеннем з удзелам аркестра, віншаваннем ад кіраўніцтва брыгады, узнагародамі лепшым ваеннаслужачым і нядоўгім “звальненнем” у горад.

Свае віншаванні салдат адрасуе родным, сябрам, усім мужчынам, словы павагі – бацьку, які для яго заўжды з’яўляецца прыкладам стойкасці і мужнасці.

Намеснік камандзіра вайсковай часці па ідэалагічнай рабоце гвардыі маёр Аляксей Нашуцінскі з 2014 года праходзіць службу ў 11 механізаванай брыгадзе. Яго малая радзіма – аграгарадок Дварэц. Тут ён нарадзіўся, скончыў сярэднюю школу і вырашыў звязаць сваё жыццё з арміяй. У 2010 годзе паступіў у Ваенную акадэмію Рэспублікі Беларусь, па заканчэнні якой размеркаваўся ў Слонім. У бліжэйшых планах – паступленне на факультэт Генеральнага штаба для павышэння кваліфікацыі.

– Служба праходзіць актыўна і насычана, брыгада ўвесь час займаецца баявой падрыхтоўкай. Наша часць удзельнічала ў ахове дзяржаўнай граніцы і выкананні іншых важных задач. Некалькі гадоў запар мы займаем першае месца сярод механізаваных брыгад Рэспублікі Беларусь, – расказвае Аляксей Вячаслававіч.

На малой радзіме мужчыну чакаюць тата, мама і бабуля, ён стараецца наведваць родны дом пры першай жа магчымасці. З нагоды Дня абаронцаў Айчыны і Узброеных Сіл Рэспублікі Беларусь ён адрасуе віншаванні не толькі ваеннаслужачым, але і мамам, якія перажываюць за сваіх дзяцей і заўжды падтрымліваюць іх:

– Матуляў, якія чакаюць сваіх сыноў, салдат тэрміновай службы, хачу запэўніць, што іх дзеці ў надзейных руках. Яны сумленна выконваюць свой  воінскі абавязак, стараюцца стаць лепшымі, мацнейшымі, сапраўднымі сынамі сваёй Айчыны.

Наталля АВЯРЧУК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga